13-iyul kuni Alisher Navoiy nomli kinosaroyda Dilshoh Media kinokompaniyasi tomonidan komediya janrida suratga olingan “Ahmadboy va Rahmatboy” nomli film premyerasi bo‘lib o‘tadi. Filmning treyleri internetga chiqarilgan bo‘lib, unda Ma’murbek Xolmedovning qahramoni film bosh rol ijrochisi (Ahmadboy) Muhammadiso Abdulxayirovga qarata: “Jigaringni sotib, pullarimni qaytarib olaman!”, deya do‘q urayotganidan, kartina firibgarlik haqida ekanini taxmin qilish mumkin.
Film taqdimoti arafasida jurnalist Feruz Muhammad kinokompaniya rahbari va film prodyuseri Mahmud Erkaboyev bilan qisqacha suhbat uyushtirdi.
— “Ahmadboy va Rahmatboy” komediyasi moliyaviy piramida qurib, qo‘lga tushgan chinozlik Ahmadboy haqidami?— Buni filmni tomosha qilganingizdan so‘ng bilib olasiz.
— Siz haqingizda: “Film prodyuseri Ahmadboyga katta pul berib kuyganlardan, shu sabab shu nom bilan film suratga oldi”, qabilida gaplar yuribdi. Bu gaplar qanchalar haqiqat?— Biz o‘z shaxsiy hayotimizda ro‘y bergan voqealarni emas, balki xalq ichida sodir bo‘layotgan hodisalar asosida film ishlaymiz. Maqsadimiz — firibgarlikdan, yomon yo‘lga kirishdan ogohlantirish. Bu filmni ko‘rgan tomoshabinlar ham mazza qilib dam olsin, ham aldanib qolmaslik uchun yanada ogoh bo‘lsin. Chinozlik Ahmadboyga hech qanday aloqam yo‘q. Film g‘oyasi Davlatbek Yo‘ldoshev va G‘ayrat Boymirzayevdan chiqqan. Film g‘oyasi haqiqatan ham bo‘lgani uchun Bayram Aytmurotov shu mavzuda ssenariy yozib berdi, unga Jur’at Sotiboldiyev va Saidpo‘lat Hakimov rejissorlik qildi. Suratga olish ishlari qishning eng sovuq kunida boshlangan bo‘lsa, premyerasi yoz chillasiga to‘g‘ri kelmoqda.
— Ahmadboy roli uchun nega aynan Muhammadiso Abdulxayirov tanlangan?— Komik aktyor deganda chet ellik aktyorlardan Mister Bin, Jim Kerri kabilar ko‘z oldimizda namoyon bo‘ladi. Menimcha, bugungi kun o‘zbek kinosida Muhammadiso Abdulxayirov komik rollar qiroli hisoblanadi. Bu aktyor ishga aniq yondashishi, ijodiy jamoaning vaqtini o‘g‘irlamay, kelishilgan vaqtda o‘z ishini bajarib ketishi sababli ham bosh rolga aynan uni munosib, deb topganmiz.
Izoh (0)