Turkiya va O‘zbekiston Sog‘liqni saqlash vazirliklari hamda Turkiya Hamkorlik va muvofiqlashtirish agentligi (TIKA) hamkorligida 2—7-iyul kunlari “O‘zbekiston—Turkiya Salomatlik haftaligi” bo‘lib o‘tdi. Bu haqda Turkiyaning O‘zbekistondagi elchixonasi ma’lum qildi.
“Gazeta.uz”ning yozishicha, xayriya aksiyasi davomida 7 yo‘nalishda (anesteziologiya va reanimatologiya, bolalar kardiovaskulyar jarrohligi, urologiya, ginekologiya, ortopediya, umumiy jarrohlik va bolalar jarrohligi) Turkiyadan kelgan jami 19 shifokor va o‘zbekistonlik 222 nafar tibbiyot mutaxassislari o‘zaro tajriba almashib, mahorat mashg‘ulotlari o‘tkazdi.
Besh kun davomida shifokorlar 184 bemorga maslahatlar berdi, ulardan 80 nafari Toshkent pediatriya tibbiyot instituti klinikasi, Respublika ixtisoslashtirilgan akusherlik va ginekologiya ilmiy-amaliy markazi, Chirchiq shahridagi perinatal markaz, Yangiyo‘l va Olmaliq shaharlaridagi tug‘uriq majmualari hamda Urganch shahridagi Onkologiya dispanseri va Respublika ixtisoslashtirilgan urologiya markazining Urganch bo‘limi klinikalarida bepul operatsiya qilindi. Ba’zi operatsiyalar jarrohlik amaliyoti tajribasini ommalashtirish maqsadida videokonferensiya vositasida translyatsiya qilindi.
Aksiya doirasi Turkiya Sog‘liqni saqlash vazirligi vakillari O‘zbekiston sog‘liqni saqlash vaziri Alisher Shodmonov bilan uchrashdi, shuningdek, Gematologiya va qon quyish instituti qoshida tashkil etilgan Suyak ko‘migi o‘zak hujayralarini transplantatsiya qilish markazi faoliyati bilan tanishdi.
Izoh (0)