Abdulla Aripov Xitoy qishloq xo‘jalik vaziri Xan Chanfu bilan muzokaralar olib bordi

O‘zbekiston bosh vaziri Abdulla Aripov Xitoy qishloq xo‘jalik vaziri Xan Chanfu bilan muzokaralar olib bordi. Bu haqda UzDaily xabar bermoqda.

Vazir O‘zbekiston hukumati rahbariga Xitoy Davlat kengashi bosh vaziri Li Ketsyanning salomini yetkazdi va uning tashrifi ikki davlat yetakchilari kelishuvlarini hayotga tatbiq etish hamda agrar sohada o‘zaro hamkorlikni ilgari surishga qaratilganini bildirdi.

“O‘zbekiston va Xitoy qishloq xo‘jaligi hamda uning mahsulotlari savdosiga investitsiyalar borasida hamkorlikni kengaytirishi lozim. Tomonlar agrosanoat parklari qurilishiga e’tibor qaratishi va xalqaro chorvachilik zonasi yaratish masalasini o‘rganib chiqishi foydadan xoli bo‘lmaydi. Shuningdek, agrar fanlar va texnologiyalar sohasidagi aloqalarni mustahkamlash, ikki davlat qishloq xo‘jaligi taraqqiyoti uchun texnologik qo‘llab-quvvatlash va bozorlarni ta’minlab berish zarur”, — ta’kidladi Xan Chanfu. 

Abdulla Aripov O‘zbekiston hukumati qishloq xo‘jaligini rivojlantirishga alohida e’tibor qaratayotgani va bu borada Xitoy tajribasini o‘rganish rejalashtirilganini aytib o‘tdi. O‘zbekiston Xitoy bilan qishloq xo‘jalik mahsulotlarini qayta ishlash, paxtachilik, ekinlarni sug‘orish, ipakchilik, qishloq xo‘jaligi mahsulotlari eksporti va fermerlar daromadini oshirish yo‘nalishlarida hamkorlikni mustahkamlash niyatida ekanligini bildirdi.