Botqoqqa qulab tushgan samolyotning uchuvchisini timsoh yeb qo‘ydi

Amerikaning Florida shtatida yerga qulab tushgan yengil motorli Cessna 152 samolyotining uchuvchisini timsoh yeb qo‘ydi, deb xabar berdi Daily Mail.

AQSh Federal aviatsiya boshqarmasining ma’lumotlariga ko‘ra, halokatga uchragan samolyot 6-iyun kuni Evergleyds serbotqoq hududidan topilgan. Mashina qoldiqlarini va uchuvchining jasadini g‘ajiyotgan reptiliyani ushbu hududdan vertolyotda uchib o‘tayotgan mahalliy WPLG telekanali xodimlari ko‘rib qolgan.

Daily Mail nashrining Mayami-Deyd okrugi politsiyasiga tayanib xabar berishicha, Cessna 152 samolyoti mahalliy Air Christian Inc. kompaniyasi tomonidan ro‘yxatga olingan. Shu bilan birga havo kemasida Dean International Flight Training & Aircraft Rentals yozgi maktabining logotipi ham bo‘lgan. Uning egasi Robert Dinning ma’lum qilishicha, halok bo‘lgan uchuvchi shanba kuni kechasi ruxsat etilmagan parvozni amalga oshirgan va ortga qaytmagan. Uning taxminicha uchuvchi qorong‘ida yo‘nalishni yo‘qotib qo‘ygan va halokatga uchragan.

Nashrning ta’kidlashicha, uchuvching shaxsi noma’lum. Biroq WPLG’ning xabar berishicha, halok bo‘lgan uchuvchi yozgi maktab talabasi Mark Ukayere bo‘lganligining ehtimoli yuqori. Uning xonadoshi Patrik Sherdakning aytishicha, Ukayere yakshanba kuni cherkovdagi xizmatga kelmaganidan nimadir bo‘lgan deya shubhaga borgan.

“U faqat kollejga boradi va uyiga qaytadi. Yakshanba kunlari esa cherkovga keladi. Hammasi shu. Men ham yakshanba kunlari cherkovga boraman”, — deydi Shedrak.