Американинг Флорида штатида ерга қулаб тушган енгил моторли Cessna 152 самолётининг учувчисини тимсоҳ еб қўйди, деб хабар берди Daily Mail.
АҚШ Федерал авиация бошқармасининг маълумотларига кўра, ҳалокатга учраган самолёт 6 июнь куни Эверглейдс серботқоқ ҳудудидан топилган. Машина қолдиқларини ва учувчининг жасадини ғажиётган рептилияни ушбу ҳудуддан вертолётда учиб ўтаётган маҳаллий WPLG телеканали ходимлари кўриб қолган.
Daily Mail нашрининг Майами-Дейд округи полициясига таяниб хабар беришича, Cessna 152 самолёти маҳаллий Air Christian Inc. компанияси томонидан рўйхатга олинган. Шу билан бирга ҳаво кемасида Dean International Flight Training & Aircraft Rentals ёзги мактабининг логотипи ҳам бўлган. Унинг эгаси Роберт Диннинг маълум қилишича, ҳалок бўлган учувчи шанба куни кечаси рухсат этилмаган парвозни амалга оширган ва ортга қайтмаган. Унинг тахминича учувчи қоронғида йўналишни йўқотиб қўйган ва ҳалокатга учраган.
Нашрнинг таъкидлашича, учувчинг шахси номаълум. Бироқ WPLG’нинг хабар беришича, ҳалок бўлган учувчи ёзги мактаб талабаси Марк Укаере бўлганлигининг эҳтимоли юқори. Унинг хонадоши Патрик Шердакнинг айтишича, Укаере якшанба куни черковдаги хизматга келмаганидан нимадир бўлган дея шубҳага борган.
«У фақат коллежга боради ва уйига қайтади. Якшанба кунлари эса черковга келади. Ҳаммаси шу. Мен ҳам якшанба кунлари черковга бораман», — дейди Шедрак.
Изоҳ (0)