Rossiya prezidenti Vladimir Putin yopiq qaror bilan Mudofaa vazirligining 12-bosh boshqarmasi rahbari general-leytenant Yuriy Sichni egallab turgan vazifasidan ozod etdi va harbiy xizmatdan bo‘shatib yubordi. Bu haqda “Kommersant”ga tayanib, Meduza xabar berdi.
Sich rahbarlik qilgan Mudofaa vazirligining boshqarmasi Rossiyaning barcha turdagi yadroviy qurol-yarog‘larini saqlash, xizmat ko‘rsatish hamda jangovar qo‘llashga tayyorlashga mas’ul bo‘lgan.
Nashrning Mudofaa vazirligidagi manbasiga ko‘ra, Sich iste’foga chiqish arizasida “sog‘lig‘imdagi muammo tufayli” deya ko‘rsatgan. Generalning iste’fosi borasidagi yopiq qaror 5-iyul kuni imzolangan.
General-leytenant o‘z intervyusida sog‘lig‘i sabab vazifasidan ketayotganini, shu bilan birga “yana bir necha oy” ishlash niyatida ekanligini tasdiqlagan. Uning o‘rniga kim kelishi mumkinligi borasidagi savolga javob berishni istamadi.
Izoh (0)