Pepeni qo‘yib yuborgan “Real” hamshahri “Atletiko”dan himoyachi Teo Ernandesni sotib oldi

Madridning “Real” klubi hamshahri “Atletiko”dan Teo Ernandesni xarid qildi. Bu haqda klub rasmiy sayti xabar berdi.

19 yoshli fransiyalik himoyachi “Qirollik klubi” uchun qanchaga tushgani aytilmagan. Avvalroq transfer 24 millionni tashkil qilishi borasida xabarlar chiqqandi. Norasmiy manbalar ma’lumotiga ko‘ra, “Real” hamshahri bilan iliq aloqalarni saqlab qolish uchun “Atletiko” hisob raqamiga katta ehtimol bilan 26 million o‘tkazib bergan.

2015-yil “Atletiko” bilan shartnoma imzolagan Teo Ernandes “Real” bolalikdagi orzu ekani haqida aytib o‘tdi. U “Atletiko” safida maydonga tushmagan. So‘nggi mavsumni “Alaves” safida ijarada o‘tkazib, 32 ta o‘yinda ishtirok etdi va 1 ta gol urdi. “Alaves”ning Ispaniya kubogi finaliga qadar yetib kelgani Teo Ernandes kelajagiga ham ijobiy ta’sir ko‘rsatdi.

Teo Ernandes Fransiya U19 safida o‘tgan yili 9 ta bellashuvda ishtirok etgandi.