Пепени қўйиб юборган «Реал» ҳамшаҳри «Атлетико»дан ҳимоячи Тео Эрнандесни сотиб олди

Мадриднинг «Реал» клуби ҳамшаҳри «Атлетико»дан Тео Эрнандесни харид қилди. Бу ҳақда клуб расмий сайти хабар берди.

19 ёшли франциялик ҳимоячи «Қироллик клуби» учун қанчага тушгани айтилмаган. Аввалроқ трансфер 24 миллионни ташкил қилиши борасида хабарлар чиққанди. Норасмий манбалар маълумотига кўра, «Реал» ҳамшаҳри билан илиқ алоқаларни сақлаб қолиш учун «Атлетико» ҳисоб рақамига катта эҳтимол билан 26 миллион ўтказиб берган.

2015 йил «Атлетико» билан шартнома имзолаган Тео Эрнандес «Реал» болаликдаги орзу экани ҳақида айтиб ўтди. У «Атлетико» сафида майдонга тушмаган. Сўнгги мавсумни «Алавес» сафида ижарада ўтказиб, 32 та ўйинда иштирок этди ва 1 та гол урди. «Алавес»нинг Испания кубоги финалига қадар етиб келгани Тео Эрнандес келажагига ҳам ижобий таъсир кўрсатди.

Тео Эрнандес Франция U19 сафида ўтган йили 9 та беллашувда иштирок этганди.