“Yoshlar” telekanaliga direktor etib tayinlangani bildirilgan O‘zbekiston xalq artisti Ozodbek Nazarbekov bugun, 1-iyul kuni Namanganda sahnaga chiqdi. Bu haqda “Daryo”ga Yangiqo‘rg‘on tuman hokimligi axborot xizmati ma’lum qildi.
Yangiqo‘rg‘on tumanining Qirg‘iziston bilan chegaradagi Nanay qishlog‘ida “Fidoying bo‘lgaymiz seni, O‘zbekiston” shiori ostida tadbir o‘tkazildi. Harbiylar, chegarachilar, qishloq ahli jamuljam bo‘lgan tadbir avvalida tuman madaniyat bo‘limi dasturi namoyish etildi. Shundan so‘ng navbat poytaxtdan kelgan san’atkorlarga berildi.
O‘zbekistonda xizmat ko‘rsatgan artist Izzat Ibrohimov va O‘zbekiston xalq artisti Gulsanam Mamazoitovadan so‘ng sahnaga Ozodbek Nazarbekov ko‘tarildi va o‘zining bir necha qo‘shig‘ini ijro etdi. Tadbir yakunida Gulsanam Mamazoitova va Ozodbek Nazarbekov ijrosidagi duet yangradi.
Eslatib o‘tamiz, xonanda “Yoshlar” telekanali rahbari etib tayinlangani haqidagi xabarlardan so‘ng ijtimoiy tarmoqlarda uning ijodiy faoliyati qay tarzda davom etishi to‘g‘risida turli taxminlar bildirilgandi.
Izoh (0)