Samarqandlik o‘qituvchilar: Obuna uchun o‘qituvchi va o‘quvchilardan yig‘ib olingan millionlab pullar qayerga ishlatilayotganini bilmaymiz

“Jamiyat” gazetasida Samarqand viloyati, Samarqand tumanidagi 49-umumiy o‘rta ta’lim maktabi jamoasining obuna masalasida yo‘llagan maktubi e’lon qilingan.

Maktab jamoasi nomidan xat yozgan Qurbonbibi Sodiqovaning ma’lum qilishicha, har yili obuna mavsumida o‘qituvchi va ishchi xodimlar oyligidan 21 foiz miqdorida ushlab qolinadi, biroq “yil davomida na birorta gazeta, na birorta jurnal olinadi”.

Maktabimizda har yili obuna mavsumida o‘qituvchi va ishchi xodimlar oylik maoshidan 21 foiz miqdorda ushlab qolinadi. Lekin yil davomida na birorta gazeta, na birorta jurnal olamiz. 4—5 nusxa yetib kelganini ham maktab kutubxonasiga yig‘ma jild qilib qo‘yishadi.

Aslida esa o‘qituvchilarning oylik maoshidan ushlab qolingan pullarga ko‘plab gazetalarga obuna bo‘lish mumkin. Maktab ma’muriyati ushlab qolingan pullar hisobidan qaysi gazetaga obuna bo‘lganligimiz to‘g‘risida kvitansiyalarni bermaydi. So‘raganimizda, rahbariyat: “Kvitansiyalar bizda turadi, sizlarga uning nima keragi bor”, deydi.

Bu borada maktab kasaba uyushmasi raisi Saodat Hayitovaga bir necha bor aytsak-da, u: “Maktab direktori mening gapimni inobatga olmaydi, nima qilay?!”, degan javobni beradi. Maktab direktori To‘xtamurod Abdurashidov esa: “Sizlarga kvitansiya nimaga kerak? Gazeta kerak bo‘lsa, ana, kutubxonaga qo‘yilgan gazetalarni o‘qiyveringlar”, deydi.

Xullas, obuna bahonasida o‘qituvchilar maoshidan ushlab qolingan millionlab pullar qayerga va qaysi maqsadda ishlatilayotganini tekshirib, aniqlik kiritilishida amaliy yordam berishlaringizni so‘raymiz. Bundan tashqari, maktabda ta’lim olayotgan 700 ga yaqin o‘quvchidan yig‘ib olingan pullar ham qayerga ishlatilayotganini bilmaymiz. O‘quvchilar ham juda kam nusxada gazeta oladi.

Bunday nomaqbul holatlarning oldini olishda ommaviy axborot vositalari ko‘magidan umidvormiz.

Qurbonbibi Sodiqova, 49-umumiy o‘rta ta’lim maktabi pedagogik jamoasi nomidan