Самарқандлик ўқитувчилар: Обуна учун ўқитувчи ва ўқувчилардан йиғиб олинган миллионлаб пуллар қаерга ишлатилаётганини билмаймиз

«Жамият» газетасида Самарқанд вилояти, Самарқанд туманидаги 49-умумий ўрта таълим мактаби жамоасининг обуна масаласида йўллаган мактуби эълон қилинган.

Мактаб жамоаси номидан хат ёзган Қурбонбиби Содиқованинг маълум қилишича, ҳар йили обуна мавсумида ўқитувчи ва ишчи ходимлар ойлигидан 21 фоиз миқдорида ушлаб қолинади, бироқ «йил давомида на бирорта газета, на бирорта журнал олинади».

Мактабимизда ҳар йили обуна мавсумида ўқитувчи ва ишчи ходимлар ойлик маошидан 21 фоиз миқдорда ушлаб қолинади. Лекин йил давомида на бирорта газета, на бирорта журнал оламиз. 4—5 нусха етиб келганини ҳам мактаб кутубхонасига йиғма жилд қилиб қўйишади.

Аслида эса ўқитувчиларнинг ойлик маошидан ушлаб қолинган пулларга кўплаб газеталарга обуна бўлиш мумкин. Мактаб маъмурияти ушлаб қолинган пуллар ҳисобидан қайси газетага обуна бўлганлигимиз тўғрисида квитансияларни бермайди. Сўраганимизда, раҳбарият: «Квитансиялар бизда туради, сизларга унинг нима кераги бор», дейди.

Бу борада мактаб касаба уюшмаси раиси Саодат Ҳайитовага бир неча бор айтсак-да, у: «Мактаб директори менинг гапимни инобатга олмайди, нима қилай?!», деган жавобни беради. Мактаб директори Тўхтамурод Абдурашидов эса: «Сизларга квитансия нимага керак? Газета керак бўлса, ана, кутубхонага қўйилган газеталарни ўқийверинглар», дейди.

Хуллас, обуна баҳонасида ўқитувчилар маошидан ушлаб қолинган миллионлаб пуллар қаерга ва қайси мақсадда ишлатилаётганини текшириб, аниқлик киритилишида амалий ёрдам беришларингизни сўраймиз. Бундан ташқари, мактабда таълим олаётган 700 га яқин ўқувчидан йиғиб олинган пуллар ҳам қаерга ишлатилаётганини билмаймиз. Ўқувчилар ҳам жуда кам нусхада газета олади.

Бундай номақбул ҳолатларнинг олдини олишда оммавий ахборот воситалари кўмагидан умидвормиз.

Қурбонбиби Содиқова, 49-умумий ўрта таълим мактаби педагогик жамоаси номидан