“Toshkent-Sharqiy” aerodromi negizida oliy darajadagi mehmonlarni kutib olish uchun aviatsiya majmuasi quriladi

O‘zbekiston Prezidenti Shavkat Mirziyoyev “Toshkent-Sharqiy” aerodromi negizida zamonaviy fuqarolik (ishchi) aviatsiya majmuasini qurish loyihasini tasdiqladi. Bu haqda UzDaily xabar bermoqda.

“Gazeta.uz”ning qayd etishicha, yangi quriladigan aviatsiya majmuasida, jumladan, oliy darajadagi xorijiy delegatsiyalarni kutib olish va kuzatishni tashkil etish uchun zarur shart-sharoit yaratiladi.

Prezident tomonidan 30-iyun kuni imzolangan qarorda ta’kidlanishicha, yangi majmua qurilishi xorijiy moliya institutlarining qarzlari, shuningdek, “O‘zbekiston havo yo‘llari” milliy aviakompaniyasining o‘z mablag‘lari hisobidan amalga oshiriladi.

O‘zbekiston davlat rahbari “O‘zbekiston havo yo‘llari”ga loyihaning texnik-iqtisodiy asosini uch oy muddatda “O‘zshaharsozlikLITI” bilan hamkorlikda ishlab chiqish va vakolatli organlari bilan kelishish hamda uni tasdiqlash uchun Vazirlar Mahkamasiga kiritish haqida ko‘rsatma bergan.

Shavkat Mirziyoyev 2018-yil 1-fevraliga qadar qurilish-montaj ishlarini loyiha-smeta hujjatlari tayyorlash bilan birga olib borishga ruxsat berdi. Shuningdek, mazkur loyiha ishtirokchilariga soliq va bojxona imtiyozlari taqdim etildi.

Qarorda qayd etilishicha, “Toshkent-Sharqiy” aerodromidagi harbiy-transport aviatsiyasi boshqa joyga ko‘chiriladi.

Avvalroq Toshkent aeroportining yangi — “Toshkent-4” xalqaro terminali qurilishi vaqtincha to‘xtatilgani haqida xabar berilgan edi.