Prezident Shavkat Mirziyoyev Toshkent shahrida paxta bo‘yicha xalqaro tadbirlarni munosib o‘tkazish bo‘yicha farmoyish qabul qildi

O‘zbekiston Respublikasi Prezidenti Shavkat Mirziyoyev “Paxta bo‘yicha xalqaro konsultativ qo‘mita 76-plenar yig‘ilishi va XIII xalqaro o‘zbek paxta va tekstil yarmarkasini o‘tkazishni tashkillash chora-tadbirlari to‘g‘risida”gi farmoyishni imzoladi. Bu haqda Norma xabar bermoqda. 

Joriy yil 23— 27-oktabr kunlari Toshkent shahri Paxta bo‘yicha xalqaro konsultativ qo‘mitaning “Globallashuv va texnologik taraqqiyot davrida paxta” mavzuidagi 76-plenar yig‘ilishiga mezbonlik qiladi. 

Uning ochilishi 23–24 oktabr kunlari bo‘lib o‘tadigan XIII xalqaro o‘zbek paxta va tekstil yarmarkasiga to‘g‘ri keladi. 

Farmoyishga binoan yarmarka savdolariga qo‘yiladigan paxta tolasi hajmlari doimiy faoliyat ko‘rsatuvchi yarmarka qo‘mitasi tomonidan O‘zbekiston Iqtisodiyot vazirligi bilan hamkorlikda belgilanadi. 

Paxta bo‘yicha xalqaro konsultativ qo‘mita, xorijiy delegatsiyalar va “O‘zpaxtasanoateksport” xolding kompaniyasi tomonidan 76-plenar yig‘ilishi uchun olib kelinadigan axborot, tarqatma va ko‘rgazma materiallar bojxona to‘lovlaridan ozod qilindi. 

“O‘zekspomarkaz” maydonlari esa XIII xalqaro o‘zbek paxta va tekstil yarmarkasi ishtirokchilari uchun 50 foizlik chegirma bilan taqdim etiladi.