Rossiya mezbonligida davom etayotgan futbol bo‘yicha Konfederatsiyalar kubogida bugun yarim finalning birinchi uchrashuvi bo‘lib o‘tadi.
Uning doirasida Yevropaning amaldagi chempioni Portugaliya Copa America g‘olibi hisoblangan Chiliga qarshi saf tortadi. Bellashuv Toshkent vaqti bilan 23:00 da start oladi va “Sport” telekanali orqali to‘g‘ridan-to‘g‘ri translyatsiya qilinadi.
Mazkur uchrashuvda o‘zbekistonlik FIFA referisi Ravshan Ermatov videotakrorlar borasida bosh hakamga ko‘mak beradi. O‘yinni eronlik Alirizo Fag‘oniy boshqarib boradi.
Portugaliya terma jamoasi “A” guruhini 7 ochko bilan peshqadam sifatida yakunlagandi. Fernandu Santush shogirdlari Rossiyani 1:0 va Yangi Zelandiyani 4:0 hisobida taslim qilgan bo‘lsa, turnirni Meksikaga qarshi durang bilan boshlagandi — 2:2.
“B” guruhida ishtirok etgan Chili termasi esa 5 ochko to‘pladi va Portugaliya kabi mag‘lubiyat nimaligini bilmadi. Xuan Antonio Pitssi boshchilik qilayotgan jamoa ilk turda Kamerun ustidan 2:0 hisobida zafar quchgan bo‘lsa, keyinroq Germaniya va Avstraliya termalari bir bir xilda — 1:1 hisobida durang o‘ynagandi.
Konfederatsiyalar kubogida yarim finalning ikkinchi o‘yini ertaga — 29-iyun kuni 23:00 da boshlanadi. Unda Germaniya termasi Meksikaga qarshi kurash olib boradi.
Izoh (0)