Fransiyalik dunyoga mashhur aktyor Jerar Depardye jinsiy zo‘ravonlikda ayblanib, Parijda hibsga olingan. Bu haqda CNN nashri xabar berdi.
Manbada aytilishicha, aktyor hozirda Parij politsiyasining tergov izolyatoriga joylashtirilgan. Depardyening advokatlari uni himoya qilish uchun qattiq ish olib borishmoqda.
CNN nashri 75 yoshli Jerar Depardye hozirda so‘roq qilinayotganini bildirgan. Aktyor bilan bir filmda suratga tushganini daʼvo qilgan ikki ayol Jerar Depardyeni jinsiy zo‘ravonlikda ayblab, sudga bergan.
Avvalroq ham Depardye bir qator ayollar unga nisbatan shikoyat bildirib chiqqanidan so‘ng, zo‘rlash va jinsiy tajovuzda ayblanib, rasmiy tergovga tortilgan edi. Fransuz aktyori o‘ziga qo‘yilgan bu ayblovlarni rad etgan.
Bunday voqea Depardye bilan bog‘liq birinchi holat emas. Ayollarga nisbatan haqoratomuz so‘zlari uchun u allaqachon Fransiyaning eng oliy mukofoti – “Faxriy legion” ordenidan mahrum qilingan. Bundan avval ispaniyalik jurnalist Rut Basa aktyorni 1995-yilda sodir bo‘lgan jinsiy zo‘ravonlikda ayblagan edi.
Izoh (0)