“40 yildan beri mashq qilaman”. 72 yoshli “terminator” otaxon bilan suhbat

Sport bilan shug‘ullanish insonni ham ruhan, ham jismonan baquvvat qiladi. Masalan, erta tongdan bajarilgan mashqlar insonga kun davomida tetiklik hamda yaxshi kayfiyat baxsh etadi. Navqiron inson bo‘la turib sport bilan shug‘ullanish bir gap, lekin 70 yoshdan oshganda ham sport bilan hamnafas yashab kelayotgan insonlar oramizda juda kam.

“Daryo” jurnalisti Sardor Ali mana shunday kam sonli insonlardan bir, yoshi 72 da bo‘lishga qaramasdan har kuni sport zalida mashq qiluvchi otaxon – O‘lmas Oxunjonov bilan suhbatlashdi.

— Qancha vaqtdan beri sport bilan shug‘ullanib kelasiz? Sportga bo‘lgan bu darajadagi muhabbatingizning boisi nimada?

— Meni ismim Oxunjonov O‘lmas. Sport bilan maktab vaqtidan beri shug‘ullanib kelaman. 40 yildan beri mashq qilaman. Hozir 72 yoshdaman. Sport muhabbat qo‘yishimda Bryus Lining hissasi katta. Men yoshligimda Jan Klod Van Damm, Arnold Shvarsenegger va Dehiginlarga havas qilganman. Birinchi tosh ko‘tarish bilan shug‘ullanganman. Bu sport turida kandidat master darajasiga chiqqanman. Undan keyin sambo va dzyudoga qiziqib qolib, shug‘ullanishni boshlaganman.

— Fitnes zalidagi toshlar siz uchun og‘irlik qilmaydimi? Bir kunda necha soat mashq qilasiz?

— Aslida kasbim quruvchi. 8 yildan beri shu mashg‘ulot zaliga kelaman. Menga toshlarni ko‘tarish qiyin emas, qaytaga shug‘ullanib zavq va kuch olaman. Men har kuni mashq qilaman. Faqat ramazon oyida bir oy zalga chiqmadim. Bir kunda 3-4 soat mashq qilaman. Oldin ham sport bilan shug‘ullanganim uchun bu yerdagi toshlarni o‘yinchoq qilib tashlayman. Men og‘ir ko‘tarishdan qo‘rqmayman. Chunki oldindan shug‘ullanib kelganman.

— Mashqlar davomida jarohat olishdan qo‘rqmaysizmi?

— Mushaklarning rivojlanishi bajarilayotgan mashqning texnikasiga bog‘liq. Bu sport turida noto‘g‘ri mashq qilsangiz, asosiy yuklama belga kelib tushadi. Shuning uchun mashq qilishdan oldin tanani qizitib olish zarur. Agar badan qizimasa, lat yeyishingiz mumkin.

— Bilamizki, sport bilan shug‘ullangan odam ovqatlanishga ham eʼtibor qaratishi lozim. Siz qanday mahsulotlar isteʼmol qilasiz?

— Men nonushtaga 5 ta bedana tuxumi qovurib yeyman. Undan keyin chuchvarani qatiq bilan yeb olaman. Organizmga bir haftada bir marotaba yuklama berish kerak. Hozir qo‘l uchun 15 kilo toshni bemalol 20-25 marotaba ko‘tara olaman.