Ukraina vazirlar mahkamasi kompyuterlarida qattiq diskdagi axborotni shifrlab qo‘yuvchi tovlamachi-virus tarqala boshlandi. Bu haqda Ukraina bosh vaziri o‘rinbosari Pavel Rozenko Facebook’dagi sahifasida ma’lum qildi, deya xabar bermoqda Meduza.
Rozenkoning matbuot kotibi Yelena Golyuk esa o‘z kompyuteri ekranidagi tasvir aks etgan suratni e’lon qildi — unda axborotni shifrlashdan chiqarish uchun 300 dollar miqdoridagi pulni bitkoinlarda to‘lash talabi ko‘rinib turibdi.
Tovlamachi-virusning ta’siri haqida avvalroq Ukraina banklari va energetika kompaniyalari xabar bergan edi. Kiyev metropolitenidagi yo‘l chiptalarini to‘ldirish terminallari ham virus bilan zararlangan.
Borispol aeroporti bosh direktori Pavel Ryabikin ham xakerlik hujumlari haqida ma’lum qildi. Uning so‘zlariga ko‘ra, aeroport sayti va reyslar jadvali tablosi ishlamayapti.
Ryabikin nosozliklarni spam-hujum bilan izohladi, bu tovlamachi-virusni ishga tushirgan xakerlarning harakati bilan bog‘liqmi yoki yo‘q — hozircha noma’lum.
Izoh (0)