O‘zbekiston tashqi ishlar vaziri Abdulaziz Komilov va Vengriya tashqi iqtisodiy aloqalar va tashqi ishlar vaziri Peter Siyyarto 2017-yil 27-iyunda Toshkent shahridagi Vengriya elchixonasining rasmiy ochilishi hamda elchixona binosida Vengriya va Yevropa Ittifoqi bayroqlari ko‘tarilishiga bag‘ishlangan marosimda ishtirok etdi. Bu haqda Tashqi ishlar vazirligi axborot xizmati xabar berdi.
Marosimda Vengriya elchisi Peter Santo, O‘zbekiston va Vegriya TIV rahbarlari nutq so‘zladi.
Vazir Abdulaziz Komilov o‘z nutqida Vengriya delegatsiyasini qutlar ekan, Vengriya elchixonasi ikki davlat o‘rtasida yaqin va manfaatli hamkorlikni yanada mustahkamlashda faol bog‘lovchi bo‘g‘in vazifasini bajarishiga ishonch bildirdi.
Abdulaziz Komilov Vengriya delegatsiyasining O‘zbekiston Vazirlar Mahkamasi, tashqi ishlar vazirligi, tashqi savdo vazirligi, qishloq va suv xo‘jaligi vazirligi, Investitsiya bo‘yicha Davlat qo‘mitasi hamda Savdo-sanoat palatasi rahbariyati bilan bo‘lib o‘tgan konstruktiv va samarali muzokaralarini mamnuniyat bilan qayd etdi.
Uchrashuvlar davomida siyosiy, savdo-iqtisodiy, investitsion va gumanitar sohalarda ikki tomonlama munosabatlarning hozirgi holati va istiqbollari muhokama qilindi.
“Ishonch bilan aytishni istardimki, bugun biz O‘zbekiston—Vengriya munosabatlari tarixida yangi sahifani ochmoqdamiz va mamlakatlarimiz o‘rtasida o‘zaro manfaatli va samarali hamkorlikni faol ilgari surish bo‘yicha birgalikdagi faoliyatimizni davom ettiramiz”, — dedi O‘zbekiston TIV rahbari.
Izoh (0)