Ўзбекистон ташқи ишлар вазири Абдулазиз Комилов ва Венгрия ташқи иқтисодий алоқалар ва ташқи ишлар вазири Петер Сийярто 2017 йил 27 июнда Тошкент шаҳридаги Венгрия элчихонасининг расмий очилиши ҳамда элчихона биносида Венгрия ва Европа Иттифоқи байроқлари кўтарилишига бағишланган маросимда иштирок этди. Бу ҳақда Ташқи ишлар вазирлиги ахборот хизмати хабар берди.
Маросимда Венгрия элчиси Петер Санто, Ўзбекистон ва Вегрия ТИВ раҳбарлари нутқ сўзлади.
Вазир Абдулазиз Комилов ўз нутқида Венгрия делегациясини қутлар экан, Венгрия элчихонаси икки давлат ўртасида яқин ва манфаатли ҳамкорликни янада мустаҳкамлашда фаол боғловчи бўғин вазифасини бажаришига ишонч билдирди.
Абдулазиз Комилов Венгрия делегациясининг Ўзбекистон Вазирлар Маҳкамаси, ташқи ишлар вазирлиги, ташқи савдо вазирлиги, қишлоқ ва сув хўжалиги вазирлиги, Инвестиция бўйича Давлат қўмитаси ҳамда Савдо-саноат палатаси раҳбарияти билан бўлиб ўтган конструктив ва самарали музокараларини мамнуният билан қайд этди.
Учрашувлар давомида сиёсий, савдо-иқтисодий, инвестицион ва гуманитар соҳаларда икки томонлама муносабатларнинг ҳозирги ҳолати ва истиқболлари муҳокама қилинди.
«Ишонч билан айтишни истардимки, бугун биз Ўзбекистон—Венгрия муносабатлари тарихида янги саҳифани очмоқдамиз ва мамлакатларимиз ўртасида ўзаро манфаатли ва самарали ҳамкорликни фаол илгари суриш бўйича биргаликдаги фаолиятимизни давом эттирамиз», — деди Ўзбекистон ТИВ раҳбари.
Изоҳ (0)