AQSh sifat belgilari va patent boshqarmasi paxta genining nokaut (o‘chirish) texnologiyasiga patent berdi. Patent shartlariga ko‘ra, texnologiya AQShdan tashqari yana dunyoning 20 ga yaqin davlatida himoya qilinadi. Bu haqda “Jahon” axborot agentligi xabar bermoqda.
Mazkur texnologiya o‘zbek olimlari tomonidan 2008-yilda yaratilgan bo‘lib, kelgusi tadqiqotlar O‘zbekiston hukumati tomonidan qo‘llab-quvvatlanishi natijasida yangi texnologiya asosida serhosil, tezpishar, uzun tolali, qurg‘oqchilikka, sho‘rxok yerga chidamli bo‘lgan “Porloq” seriyasi navlaridan biri bo‘lgan yangi nav yaratildi.
Ayni paytda tolaning “Porloq” navi boshqa navlarga nisbatan 12 foiz qimmatroqqa sotilib, unga jahon bozorida talab juda kuchli. “Porloq” navi 2017-yilda respublikaning 52 ming gektardan ortiq yeriga ekilib, kelajakda yanada ko‘proq maydonga ekilishi ko‘zda tutilgan.
AQSh patent boshqarmasiga murojaat etish juda qiyin va ko‘p mehnat talab qiladigan jarayondir. Uning murakkabligiga olingan natijalarni batafsil tekshirish va murojaatchining boshqa davlatda yashashi sabab bo‘ladi.
“Talabnoma 2012-yilning aprel oyida berilgan edi. Amerikalik mutaxassislar tadqiqotimizning to‘g‘riligiga va patent olishga loyiqligiga ishonch hosil qilish uchun uni batafsil o‘rgandi. Molekulyar texnologiya borasida har qanday davlat ham bunday imkoniyatga ega emas. Biz besh yil davomida ular bilan tinimsiz xabarlashib, patent boshqarmasining har bir savoliga asosli javob berib keldik. Va nihoyat, uzoq yillik muzokaralardan keyin, AQSh sifat belgisi va patent boshqarmasi bizga patent berdi”, — deb ma’lumot berdi O‘zbekiston Fanlar akademiyasi Genomika va bioinformatika markazi direktori, professor Ibrohim Abdurahmonov.
Izoh (0)