АҚШ сифат белгилари ва патент бошқармаси пахта генининг нокаут (ўчириш) технологиясига патент берди. Патент шартларига кўра, технология АҚШдан ташқари яна дунёнинг 20 га яқин давлатида ҳимоя қилинади. Бу ҳақда «Жаҳон» ахборот агентлиги хабар бермоқда.
Мазкур технология ўзбек олимлари томонидан 2008 йилда яратилган бўлиб, келгуси тадқиқотлар Ўзбекистон ҳукумати томонидан қўллаб-қувватланиши натижасида янги технология асосида серҳосил, тезпишар, узун толали, қурғоқчиликка, шўрхок ерга чидамли бўлган «Порлоқ» серияси навларидан бири бўлган янги нав яратилди.
Айни пайтда толанинг «Порлоқ» нави бошқа навларга нисбатан 12 фоиз қимматроққа сотилиб, унга жаҳон бозорида талаб жуда кучли. «Порлоқ» нави 2017 йилда республиканинг 52 минг гектардан ортиқ ерига экилиб, келажакда янада кўпроқ майдонга экилиши кўзда тутилган.
АҚШ патент бошқармасига мурожаат этиш жуда қийин ва кўп меҳнат талаб қиладиган жараёндир. Унинг мураккаблигига олинган натижаларни батафсил текшириш ва мурожаатчининг бошқа давлатда яшаши сабаб бўлади.
«Талабнома 2012 йилнинг апрель ойида берилган эди. Америкалик мутахассислар тадқиқотимизнинг тўғрилигига ва патент олишга лойиқлигига ишонч ҳосил қилиш учун уни батафсил ўрганди. Молекуляр технология борасида ҳар қандай давлат ҳам бундай имкониятга эга эмас. Биз беш йил давомида улар билан тинимсиз хабарлашиб, патент бошқармасининг ҳар бир саволига асосли жавоб бериб келдик. Ва ниҳоят, узоқ йиллик музокаралардан кейин, АҚШ сифат белгиси ва патент бошқармаси бизга патент берди», — деб маълумот берди Ўзбекистон Фанлар академияси Геномика ва биоинформатика маркази директори, профессор Иброҳим Абдураҳмонов.
Изоҳ (0)