O‘zbekiston tashqi ishlar vaziri Abdulaziz Komilov 2017-yil 26-iyunda Niderlandiya qirolligining yangi tayinlangan favqulodda va muxtor elchisi Regina Veronika Mariya Jons-Bosni qabul qildi. Bu haqda Tashqi ishlar vazirligi axborot xizmati ma’lum qildi.

Elchi ishonch yorliqlarini topshirdi. Vazir elchini O‘zbekistonda diplomatik missiyasini boshlagani bilan tabrikladi hamda yuqori va mas’uliyatli lavozimda omad tiladi.

Suhbat davomida O‘zbekiston — Niderlandiya aloqalarini yanada rivojlantirish istiqbollari hamda ayrim xalqaro va mintaqaviy muammolar yuzasidan fikr almashildi.

O‘zbekiston va Niderlandiya o‘rtasida diplomatik munosabatlar o‘rnatilganidan so‘ng 25 yil davomida erishilgan yuqori darajadagi hamkorlik ijobiy baholandi. Shuningdek, aloqalarni barcha sohalarda kengaytirish, xususan 2017—2021-yillarda mamlakatni rivojlantirishning beshta ustuvor yo‘nalishi bo‘yicha Harakatlar strategiyasini amalga oshirish doirasida munosabatlarni rivojlanritish uchun tomonlar ulkan salohiyatga egaligi ta’kidlandi.

Muzokaralar chog‘ida siyosiy sohada hamkorlikni chuqurlashtirish, ikki davlat ishbilarmon doiralari, turizm, ilm-fan, ta’lim, madaniyat va san’at vakillari o‘rtasida to‘g‘ridan to‘g‘ri va o‘zaro manfaatli aloqalarni faollashtirishdan tomonlar manfaatdor ekanligi qayd etildi.

Uchrashuvda ikki tomon kun tartibidagi boshqa masalalarni ham muhokama qildi.

Ma’lumot uchun, Niderlandiya elchisining qarorgohi Moskva shahrida joylashgan.