O‘zbekiston Prezidentining 22-iyundagi qarori bilan respublika iqtisodiyoti tarmoqlari va ijtimoiy sohalarini 2017/2018-kuz-qish mavsumida barqaror ishlashga kompleks tarzda tayyorlashni ta’minlash chora-tadbirlari tasdiqlandi. Hujjat matnini O‘zbekiston Respublikasi Prezidentining rasmiy veb-sayti e’lon qildi.
Hujjatga muvofiq, Vazirlar Mahkamasi tomonidan Bosh vazir o‘rinbosarlari rahbarligidagi uchta ishchi guruh tuzildi, ular quyidagi yo‘nalishlarni o‘z ichiga oladi:
- ko‘p xonadonli uylarni kuz-qishki davrda ishlashga tayyorlash, issiqlik va suv ta’minotini, liftlarni, umumiy foydalanish joylarini tartibga keltirish va tegishli holatda saqlash, mahallalar hududlarining sanitar holatini ta’minlash, obodonlashtirish ishlarini tashkil qilish;
- ijtimoiy soha, iqtisodiyot tarmoqlari obyektlarini va aholini yoqilg‘i-energetika manbalari bilan o‘z vaqtida va yetarlicha ta’minlash ishlarini tashkillashtirish, elektr ta’minoti, gaz ta’minoti obyektlarini va ko‘mir sohasi korxonalarini kuz-qishki davrga tayyorlash;
- ijtimoiy soha obyektlarini kuz-qishki davrda barqaror ishlashga tayyorlash, ularning sanitar holat va obodonchilik bo‘yicha talablarga javob berishini ta’minlash.
Qoraqalpog‘iston Vazirlar Kengashi raisi, viloyatlar va Toshkent shahar hokimlari, davlat va xo‘jalik boshqaruvi organlari hamda boshqa tashkilotlar rahbarlari 2017/2018-yillarning kuz-qish mavsumida iqtisodiyot tarmoqlarining barqaror ishlashini ta’minlashga qaratilgan tadbirlar va ishlar o‘z vaqtida va sifatli bajarilishi yuzasidan shaxsan mas’uldir, deyiladi hujjatda.
Izoh (0)