Остонада бўлиб ўтаётган Евросиё Медиа Форумида унинг ташкилотчиси ва Қозоғистон сиёсат арбоби Дариға Назарбоева «Дарё» бош муҳаррири Алишер Азимов билан блиц-интервью ўтказишга илтифот билан розилик берди. Назарбоева Ўзбекистон ҳақида жуда илиқ фикрлар билдирди.
«Сизнинг халқингиз жуда меҳнатсевар. Қардош республикада фаолиятнинг барча соҳаларида бўлиб ўтаётган ислоҳотлар Қозоғистонда катта қизиқишни келтириб чиқармоқда. Икки томонлама алоқаларга сўнгги пайтда кучли туртки берилган, савдо-иқтисодий алоқаларнинг мустаҳкамланиши (биз буни сезяпмиз) қувонтиради ва оптимизмга йўналтиради. Кичик бизнес ва хусусий тадбиркорликнинг қўллаб-қувватланиши кучайиши сабабли Ўзбекистон яқин вақтлардаёқ минтақанинг ривожланган мамлакатлари қаторига киришга қодир, бу эса ўз навбатида, минтақамиздаги иқтисодий вазиятга ижобий таъсир кўрсатади. Катта салоҳиятга эга икки томонлама алоқалар тез орада энг ижобий самараларни кўрсатишига ишончимиз комил, Ўзбекистон олий раҳбарияти ҳам шу нарсага чин дилдан интилмоқда», — деди Дариға Назарбоева.
Инсониятнинг глобал муаммолари ва уларни ҳал этиш йўлларига қаратилган худди шундай Евросиё Медиа Форумини ўтказиш имконияти ҳақидаги саволга жавоб берар экан, Дариға Назарбоева бундай ғояни маъқуллади ва Қозоғистон, ўз навбатида, бундай кўламдаги тадбирни ўтказиш тажрибаси билан бўлишишга тайёрлигини қўшиб қўйди.
Дариға Назарбоева мамлакатларимиз ўртасида парламентлараро ҳамкорлик доирасида 2017 йил сентябрида Ўзбекистонга ташриф буюришни режалаштираётганини маълум қилди.
Эслатиб ўтамиз, ҳар йили Қозоғистоннинг Остона шаҳрида ўтказилиб, 60 мамлакатдан 600 дан зиёд делегатларни тўплайдиган халқаро баҳс-мунозара майдони — Евросиё Медиа Форумида бу йил «Дарё» нашри вакили ҳам қатнашмоқда.
Форум расмий сайтида ёзилишича, Евросиё Медиа Форуми ҳозирги куннинг энг долзарб мавзулари бўйича дунё медиамайдонининг энг аҳамиятли иштирокчилари, фикрлар етакчилари ва турли соҳаларнинг тан олинган профессионаллари иштирокидаги очиқ мулоқотдир.
Форум ўз фаолиятини 2002 йилда бошлаб, ўшандан буён сиёсий, иқтисодий ва ижтимоий масалаларнинг кенг доирасига ўз таъсирини ўтказа оладиган, дунё кўламидаги ҳодиса сифатида ўзини кўрсатди, дейилади расмий сайтда.
Форум таъсис этилган вақтдан буён унинг ғоявий илҳомчиси ва ташкилий қўмита раиси сифатида сиёсат фанлари доктори Дариға Назарбоева фаолият юритиб келмоқда.
Изоҳ (0)