AQSh boshchiligidagi xalqaro koalitsiya Suriyadagi samolyotlar dispozitsiyasi —joylashuvini o‘zgartirishga qaror qildi. Bu haqda AQSh Harbiy-havo kuchlari markaziy qo‘mondonligi vakili Damian Pikart ma’lum qildi, deya xabar beradi “Gazeta.ru”.
“Suriya tuzumi va Rossiya kuchlari bilan bog‘liq yaqindagi to‘qnashuvlar tufayli Suriya osmoni ustida samolyotlarni qayta yo‘naltirishga qaratilgan choralarni qabul qildik. Bu IShID marralariga hujumni davom ettirgan holda jang hududidagi ma’lum xatarlarni inobatga olib, ekipajlarimiz xavfsizligini ta’minlashga qaratilgan”, — dedi Damian Pikart.
Eslatib o‘tamiz, oldiroq Rossiya mudofaa vazirligi havodagi ko‘ngilsizliklarni bartaraf qilish borasida Pentagon bilan hamkorlik qilishni to‘xtatganini ma’lum qildi. Bunga 18-iyun kuni Suriya harbiy-havo kuchlarining Su-22 samolyoti AQSh tomonidan urib tushirilgani sabab bo‘ldi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)