Futbol afsonasi Birodar Abduraimov milliy terma jamoaning so‘nggi natijalari haqida o‘z fikrini bildirdi, deb yozdi “Stadion” nashri. Bunda mutaxassis Samvel Babayan murabbiylik qilayotgan jamoaning bir qator og‘riqli nuqtalariga to‘xtalib o‘tgan.
Eron — O‘zbekiston 1:0
Bu o‘yinda har ikki jamoa o‘rtasidagi farq yaqqol ko‘rinib qoldi. Forslarning har bir chizig‘ida yetarlicha variant bor edi. Bizda esa......bizda o‘zbek futboli tarixidagi eng kuchsiz jamoa maydonga tushdi, degan fikrga to‘liq qo‘shilaman. Samvel Babayan o‘sha gapini nima uchun aytganini bilmadim-ku, biroq unga istalgancha e’tiroz bildirish mumkin. Oddiy misol, 1994-yilda O‘zbekiston terma jamoasi Osiyo o‘yinlarida g‘olib chiqqandi. Hozirgi tarkib nimani qoyillatdi?
Bir o‘ylab ko‘ring, Odil Ahmedov Mirjalol Qosimovdan kuchlimi? Yoki Igor Sergeyevni Shkvirin bilan tenglashtirib bo‘ladimi? Andrey Fyodorov va Anzur Ismoilov o‘rtasidagi farqni Babayan tushunarmikan? Qani bosh murabbiy bizga va’da bergan o‘sha falsafa? Axir falsafa tugul o‘yinning o‘zi yo‘q-ku! Jahon chempionatida o‘ynash uchun unga munosib bo‘lish kerak. Kechagi o‘yinda mundialga munosib bo‘lgan faqat bitta jamoani ko‘rdik — Eron. Biz esa o‘z muammolarimizga o‘ralashib qolganmiz.
Birodar Abduraimov, O‘zbekiston futboli faxriysi
Terma jamoa tarkibi haqida
Endi bir gap-da, g‘alaba qozonish uchun hujum qilish kerak. Bu o‘yinda tayinli hujum ko‘rdikmi, o‘zi?! Temurxo‘ja Abduxoliqov bir marta darvozaga zarba berganini aytmasa, boshqa vaziyatning o‘zi bo‘lmadi-ku! Igor Sergeyev nima uchun maydonga tushganini o‘zi ham bilmasa kerak. Umuman, bu hujumchining termaga munosib yoki yo‘qligining o‘zi bir savol. Terma jamoa uchun da’vogarlarda bir-biri bilan raqobat bo‘lishi kerak. Kamida 4—5 futbolchi bir joy uchun kurashsin. Bizda vaziyat qanday? Hujumda kimni ko‘rsata olasiz? O‘zi bir yarimta hujumchimiz bo‘lsa, kim o‘yinni kuchaytira oladi?Eronni Tehronda mag‘lub etganimizda ular kuchsiz edi deb ayta olmayman. Bunaqa natijalar uchrab turadi. Eron o‘shanda ham kuchli edi, shunga qaramay, yengishning uddasidan chiqishgan. Biz ham 60-yillarda ketma-ket chempion bo‘layotgan “Spartak”ni safarda 1:0 hisobida yenggandik.
Raqib o‘sha o‘yindan beri ancha kuchaydi. Ular Yevropaning kuchli jamoalari bilan o‘rtoqlik o‘yinlari o‘tkazishyapti. O‘zbekiston termasida esa muammolar keragidan ham ortiq. Biz oddiygina tarkib masalasida ham to‘g‘ri ish olib bora olmayapmiz. Masalan, “Paxtakor”dan chaqirilgan futbolchilarni oladigan bo‘lsak, Aleksandr Lobanov, Igor Sergeyev, Davron Hoshimov va Stanislav Andreyevlarning qanaqaligini O‘zbekiston kubogidagi “Nasaf”ga qarshi o‘yinda ko‘rgandik. Ularni terma jamoaga chaqiraverishning o‘zi qanchalik to‘g‘ri? Yana ham Davron Hoshimovga qizil kartochka ko‘rsatilmadi. Hakam ayadi, uni bemalol chetlatishi mumkin edi.
Birodar Abduraimov, O‘zbekiston futboli faxriysi
O‘FFga e’tiroz
Hozir nafaqat bosh murabbiyga, O‘FFga ham e’tirozlar yetarli. Federatsiya rahbariyati terma jamoaga yangi bosh murabbiy tayinlash chog‘ida faxriylar bilan maslahatlashsa, yaxshi bo‘lardi. Samvel Babayanga termani topshirish vaqtida bizning fikrimiz bilan hech kim qiziqmadi. Rahbariyat bir og‘iz so‘raganda, biz ham o‘z fikrimizni aytgan bo‘lardik. Terma jamoani boshqarishga Samvel Babayandan boshqa nomzod yo‘qmidi?Samvel Babayan boshqarayotgan jamoaning kuchli uchlikka kira olishiga shubha tug‘ilmoqda. U bizga ko‘p narsalarni va’da qilgandi. O‘zi aytganidek Osiyoda taniqli bo‘ladigan o‘yin uslubi qani?
Jahon chempionatiga chiqish uchun o‘yinimizni kuchaytirib, Osiyoda o‘z o‘rnimizga ega bo‘lishimiz lozim. Erondagi o‘yin mundialga nomunosib ekanimizni ko‘rsatib berdi. Kim aybdor? Bu savolga endi o‘zingiz javob topavering.
Hozir vaziyat shundayki, futbolda suyagi qotgan, ish ko‘rsatganlar bir chetda tomoshabin bo‘lib turibdi. Professional bo‘lmaganlar esa bosh rolda. Bir o‘ylab ko‘ring, Karlush Keyrush qayerda-yu, Samvel Babayan qayerda? Eron uchrashuvni juda aqlli o‘tkazdi, har bir futbolchi aniq maqsad bilan harakat qildi. Bizda esa 3—4 futbolchi jon kuydirib o‘ynadi, qolganlari tomosha qilib turdi. Jahon chempionati yo‘llanmasi hal bo‘ladigan o‘yinni ham shunday o‘tkazadimi?
Birodar Abduraimov, O‘zbekiston futboli faxriysi
Izoh (0)