Футбол афсонаси Биродар Абдураимов миллий терма жамоанинг сўнгги натижалари ҳақида ўз фикрини билдирди, деб ёзди «Стадион» нашри. Бунда мутахассис Самвел Бабаян мураббийлик қилаётган жамоанинг бир қатор оғриқли нуқталарига тўхталиб ўтган.
Эрон — Ўзбекистон 1:0
Бу ўйинда ҳар икки жамоа ўртасидаги фарқ яққол кўриниб қолди. Форсларнинг ҳар бир чизиғида етарлича вариант бор эди. Бизда эса......бизда ўзбек футболи тарихидаги энг кучсиз жамоа майдонга тушди, деган фикрга тўлиқ қўшиламан. Самвел Бабаян ўша гапини нима учун айтганини билмадим-ку, бироқ унга исталганча эътироз билдириш мумкин. Оддий мисол, 1994 йилда Ўзбекистон терма жамоаси Осиё ўйинларида ғолиб чиққанди. Ҳозирги таркиб нимани қойиллатди?
Бир ўйлаб кўринг, Одил Аҳмедов Миржалол Қосимовдан кучлими? Ёки Игорь Сергеевни Шквирин билан тенглаштириб бўладими? Андрей Фёдоров ва Анзур Исмоилов ўртасидаги фарқни Бабаян тушунармикан? Қани бош мураббий бизга ваъда берган ўша фалсафа? Ахир фалсафа тугул ўйиннинг ўзи йўқ-ку! Жаҳон чемпионатида ўйнаш учун унга муносиб бўлиш керак. Кечаги ўйинда мундиалга муносиб бўлган фақат битта жамоани кўрдик — Эрон. Биз эса ўз муаммоларимизга ўралашиб қолганмиз.
Биродар Абдураимов, Ўзбекистон футболи фахрийси
Терма жамоа таркиби ҳақида
Энди бир гап-да, ғалаба қозониш учун ҳужум қилиш керак. Бу ўйинда тайинли ҳужум кўрдикми, ўзи?! Темурхўжа Абдухолиқов бир марта дарвозага зарба берганини айтмаса, бошқа вазиятнинг ўзи бўлмади-ку! Игорь Сергеев нима учун майдонга тушганини ўзи ҳам билмаса керак. Умуман, бу ҳужумчининг термага муносиб ёки йўқлигининг ўзи бир савол. Терма жамоа учун даъвогарларда бир-бири билан рақобат бўлиши керак. Камида 4—5 футболчи бир жой учун курашсин. Бизда вазият қандай? Ҳужумда кимни кўрсата оласиз? Ўзи бир яримта ҳужумчимиз бўлса, ким ўйинни кучайтира олади?Эронни Теҳронда мағлуб этганимизда улар кучсиз эди деб айта олмайман. Бунақа натижалар учраб туради. Эрон ўшанда ҳам кучли эди, шунга қарамай, енгишнинг уддасидан чиқишган. Биз ҳам 60 йилларда кетма-кет чемпион бўлаётган «Спартак»ни сафарда 1:0 ҳисобида енггандик.
Рақиб ўша ўйиндан бери анча кучайди. Улар Европанинг кучли жамоалари билан ўртоқлик ўйинлари ўтказишяпти. Ўзбекистон термасида эса муаммолар керагидан ҳам ортиқ. Биз оддийгина таркиб масаласида ҳам тўғри иш олиб бора олмаяпмиз. Масалан, «Пахтакор»дан чақирилган футболчиларни оладиган бўлсак, Александр Лобанов, Игорь Сергеев, Даврон Ҳошимов ва Станислав Андреевларнинг қанақалигини Ўзбекистон кубогидаги «Насаф»га қарши ўйинда кўргандик. Уларни терма жамоага чақираверишнинг ўзи қанчалик тўғри? Яна ҳам Даврон Ҳошимовга қизил карточка кўрсатилмади. Ҳакам аяди, уни бемалол четлатиши мумкин эди.
Биродар Абдураимов, Ўзбекистон футболи фахрийси
ЎФФга эътироз
Ҳозир нафақат бош мураббийга, ЎФФга ҳам эътирозлар етарли. Федерация раҳбарияти терма жамоага янги бош мураббий тайинлаш чоғида фахрийлар билан маслаҳатлашса, яхши бўларди. Самвел Бабаянга термани топшириш вақтида бизнинг фикримиз билан ҳеч ким қизиқмади. Раҳбарият бир оғиз сўраганда, биз ҳам ўз фикримизни айтган бўлардик. Терма жамоани бошқаришга Самвел Бабаяндан бошқа номзод йўқмиди?Самвел Бабаян бошқараётган жамоанинг кучли учликка кира олишига шубҳа туғилмоқда. У бизга кўп нарсаларни ваъда қилганди. Ўзи айтганидек Осиёда таниқли бўладиган ўйин услуби қани?
Жаҳон чемпионатига чиқиш учун ўйинимизни кучайтириб, Осиёда ўз ўрнимизга эга бўлишимиз лозим. Эрондаги ўйин мундиалга номуносиб эканимизни кўрсатиб берди. Ким айбдор? Бу саволга энди ўзингиз жавоб топаверинг.
Ҳозир вазият шундайки, футболда суяги қотган, иш кўрсатганлар бир четда томошабин бўлиб турибди. Профессионал бўлмаганлар эса бош ролда. Бир ўйлаб кўринг, Карлуш Кейруш қаерда-ю, Самвел Бабаян қаерда? Эрон учрашувни жуда ақлли ўтказди, ҳар бир футболчи аниқ мақсад билан ҳаракат қилди. Бизда эса 3—4 футболчи жон куйдириб ўйнади, қолганлари томоша қилиб турди. Жаҳон чемпионати йўлланмаси ҳал бўладиган ўйинни ҳам шундай ўтказадими?
Биродар Абдураимов, Ўзбекистон футболи фахрийси
Изоҳ (0)