Andijon viloyati miqyosida o‘tkazilayotgan keng qamrovli “Qora dori-2017” tadbiri davomida Shahrixon tumanida 21 kilogramm marixuanani sotishga uringan shaxs qo‘lga olindi. Bu haqda Andijon viloyati IIB “Daryo”ga ma’lum qildi.
Xabar berishlaricha, Shahrixon tumani IIB tomonidan o‘tkazilgan tadbir natijasida shu tumanda yashovchi, ayni vaqtda Bo‘z tumanidagi mevali bog‘da ishlovchi shaxs 3 dona polietilen qopga joylashtirilgan jami og‘irligi 21 kilogramm 160 gramm marixuana giyohvand moddasini 1 million so‘m evaziga sotayotgan vaqtda ushlangan.
Mazkur holat yuzasidan Shahrixon tuman IIB huzuridagi Tergov departamenti tomonidan Jinoyat Kodeksining 273-moddasi 5-qismi (“ko‘p miqdordagi giyohvandlik vositalarini sotish”) bilan jinoyat ishi qo‘zg‘atilgan.
Hozirda jinoyat ishi bo‘yicha dastlabki tergov harakatlari olib borilmoqda.
Izoh (0)