Italiya huquq-tartibot organlari Chernogoriya hamda Makedoniyaning soxta shahzodasini fosh etdi. Mavjud ma’lumotlarga ko‘ra, Stefan Sernetich ko‘plab aristokrat hamda mashhurlarni aldagan. Bu haqda Daily Mail’ga tayanib, “Gazeta.ru” xabar berdi.
Firibgar butun dunyo bo‘ylab ijtimoiy tadbirlarda diplomatlar, yulduzlar hamda biznesmenlar bilan uchrashish maqsadida o‘zini qirollar naslidan deya tanishtirgan.
U o‘zining saytiga ko‘plab suratlarni, jumladan, tennischi Novak Jokovich va Monako arxiyepiskopi bilan birga tushgan rasmlarini joylab borgan. U hatto 2015-yilda aktrisa hamda model Pamela Andersonga unvon ham topshirgan.
56 yoshli Sernetichga nisbatan tergov boshlangan. Uning yonidan soxta hujjatlar, jumladan, pasport topilgan. Taxminlarga ko‘ra, soxta shahzoda aslida — Sloveniya bilan chegaradosh hududda tug‘ilgan va hozirda Turinda yashayotgan italiyalik.
Tergovga Sernetich to‘xtagan mehmonxona xo‘jayinining shikoyati sabab bo‘lgan. Soxta shahzoda mehmonxonada yashagan vaqti uchun pul to‘lamasdan, hisobni Makedoniyaning Rimdagi elchixonasiga yuborishni taklif qilgan, biroq diplomatik vakolatxona xodimlari Sernetich kimligini tanimagan.
Izoh (0)