Италия ҳуқуқ-тартибот органлари Черногория ҳамда Македониянинг сохта шаҳзодасини фош этди. Мавжуд маълумотларга кўра, Стефан Сернетич кўплаб аристократ ҳамда машҳурларни алдаган. Бу ҳақда Daily Mail’га таяниб, «Газета.ru» хабар берди.
Фирибгар бутун дунё бўйлаб ижтимоий тадбирларда дипломатлар, юлдузлар ҳамда бизнесменлар билан учрашиш мақсадида ўзини қироллар наслидан дея таништирган.
У ўзининг сайтига кўплаб суратларни, жумладан, теннисчи Новак Жокович ва Монако архиепископи билан бирга тушган расмларини жойлаб борган. У ҳатто 2015 йилда актриса ҳамда модель Памела Андерсонга унвон ҳам топширган.
56 ёшли Сернетичга нисбатан тергов бошланган. Унинг ёнидан сохта ҳужжатлар, жумладан, паспорт топилган. Тахминларга кўра, сохта шаҳзода аслида — Словения билан чегарадош ҳудудда туғилган ва ҳозирда Туринда яшаётган италиялик.
Терговга Сернетич тўхтаган меҳмонхона хўжайинининг шикояти сабаб бўлган. Сохта шаҳзода меҳмонхонада яшаган вақти учун пул тўламасдан, ҳисобни Македониянинг Римдаги элчихонасига юборишни таклиф қилган, бироқ дипломатик ваколатхона ходимлари Сернетич кимлигини танимаган.
Изоҳ (0)