Buyuk Britaniya hukumati ushbu haftada yonib ketgan Londondagi ko‘p qavatli uyda istiqomat qiluvchilarga ko‘mak berish maqsadida 5 million funt sterling (6,39 million dollar) ajratadi. Bu haqda Sky News telekanali bosh vazir Tereza Meyning bayonotiga asoslanib ma’lum qildi, deb xabar berdi “Interfaks”.
“Men bugun tilga olayotgan chora-tadbirlar yordamga muhtojlarga zudlik bilan ko‘mak berishga, jabrlanganlar hamda ularning yaqinlariga g‘amxo‘rlik qilishga yo‘naltirilgan. Ushbu fojiadan jabr chekkan barcha bunday og‘ir vaziyatda hukumatning yordamiga muhtoj va men buni ularga taqdim etmoqchiman”, — dedi Tereza Mey.
Telekanal ma’lumotlariga ko‘ra, ajratilgan mablag‘ yong‘in oqibatida boshpanasiz qolganlarga yangi uy-joy qurish va boshqa xarajatlar uchun sarflanadi.
Avvalroq, Londondagi Grenfell Tower ko‘p qavatli binosida ro‘y bergan yong‘in qurbonlari soni 70 kishigacha yetishi mumkinligi xabar berilgandi.
Izoh (0)