TIVda AQSh Davlat departamenti delegatsiyasi bilan uchrashuv bo‘lib o‘tdi

8-iyun kuni O‘zbekiston Tashqi ishlar vazirligida AQSh Davlat departamentining Janubiy va Markaziy Osiyo masalalari bo‘yicha byurosining Markaziy Osiyo bo‘yicha ofisi direktori Valter Skott Rid Uchinchi boshchiligidagi delegatsiya bilan uchrashuv bo‘lib o‘tdi. Bu haqda TIV matbuot xizmati xabar berdi.

Suhbat davomida siyosiy, savdo-iqtisodiy, investitsiya, madaniy-gumanitar va boshqa sohalardagi O‘zbekiston–AQSh kun tartibining dolzarb masalalari yuzasidan fikr almashildi.

TIVda bo‘lib o‘tgan uchrashuvda erishilgan kelishuvlarni amalga oshirish jarayoni hamda turli darajalardagi bo‘lajak uchrashuvlarning jadvali va kun tartibi ko‘rib chiqildi.

Xalqaro muammolarni muhokama qilish doirasida mintaqaviy masalalarga alohida e’tibor qaratildi.