Haydovchilar Toshkent—Samarqand yo‘lining Jizzax dovonidan o‘tgan qismi ta’mirlanmayotganidan shikoyat qildi

Toshkent—Samarqand avtomobil yo‘li bo‘ylab qatnovchi haydovchilar yo‘lning Jizzax viloyati G‘allaorol tumanidagi tog‘li hududdan o‘tgan qismi ayanchli ahvolda ekanligidan shikoyat qildi. Bu haqda “Daryo”ga mobil muxbir Baxtiyor Lapasov ma’lum qildi.

“Bu yo‘l o‘tgan yili yaxshi xizmat qilib turgan edi, lekin uni buzishdi. Buzilishga buzildi-yu, qayta qurilmadi, shundayligicha qolib ketdi. Mana, bir yil bo‘ldiki, judayam ayanchli ahvolda. Biz haydovchilar kuniga o‘tib-qaytamiz, kuniga millionlab yengil va yuk mashinalari majburlikdan shu yo‘l orqali harakatlanmoqda”, — deb yozadi mobil muxbir.

Uning ta’kidlashicha, ko‘tarilib boradigan yo‘lda kichik tezlikda uzoq vaqt harakatlanish natijasida, avtomobillar qizib ketmoqda yoki balonlari teshilib yo‘lda qolib ketmoqda, buning oqibatida esa uzundan-uzoq tirbandlik yuzaga kelmoqda.

“YPX xodimlari va mansabdor shaxslar changda yurishni xohlamaydi va qarama-qarshi yo‘ldan yurmoqda, oddiy haydovchilar ularning ortidan harakatlansa, judayam katta jarima solinmoqda. Xo‘sh, nega bu yo‘l ta’mirlanmayapti? Va bu qachongacha davom etadi?” — deya o‘z gaplari tegishli idoralargacha yetib borishiga umid qiladi mobil muxbir.