O‘zbekistonning Janubiy Koreyadagi elchixonasi tomonidan Turizmni rivojlantirish davlat qo‘mitasi, “O‘zbekiston havo yo‘llari” milliy aviakompaniyasi bilan hamkorlikda tashkil qilingan tadbirda yetakchi sayyohlik kompaniyalari, vazirlik va idoralarning 200 dan ortiq vakili qatnashdi. Bu haqda O‘zA xabar berdi.
Tadbir ishtirokchilariga O‘zbekistonda turizm sohasini rivojlantirish, infratuzilmani takomillashtirish va modernizatsiya qilish, mehmonlar uchun xizmat ko‘rsatish sifatini yaxshilash va qulay shart-sharoitlar yaratish bo‘yicha bajarilayotgan ishlar xususida batafsil ma’lumot berildi.
Ekologik, ekstremal, ov qilish, gastronomik, davolash-sog‘lomlashtirish turizmi, alpinizm, baliq ovlash, bayking kabi turli dam olish va ko‘ngilochar tadbirlar uyushtirish, Mo‘ynoq tumanida xalqaro turistik klaster tashkil etish bo‘yicha amalga oshirilayotgan chora-tadbirlarga alohida e’tibor qaratildi.
Koreya Respublikasi Turistik agentliklar assotsiatsiyasi raisi Yang Mu Song mazkur tadbir Janubiy Koreyaning turistik kompaniyalari va jamoatchiligi vakillariga O‘zbekistonning sayyohlik imkoniyatlari, jahonga mashhur arxitektura yodgorliklari va turfa madaniyati bilan tanishish imkonini berganini ta’kidladi.
Koreys tilida namoyish etilgan “O‘zbekistonga yo‘l” filmi ishtirokchilarda katta qiziqish uyg‘otdi. Tashkil etilgan fotoekspozitsiyada ishtirokchilar mamlakat tabiati, qadimiy shaharlari, noyob arxitektura yodgorliklari, diqqatga sazovor joylari va bugungi taraqqiyoti ko‘rsatkichlari bilan tanishdi. O‘zbekiston xalqining boy madaniyati va an’analarini ochib bergan amaliy-bezak san’ati buyumlari namoyishi ham ishtirokchilar e’tiborini tortdi.
Tadbir doirasida O‘zbekiston va Janubiy Koreya turoperatorlari ishtirokida B2B formatida o‘tkazilgan uchrashuvlarda mamlakatga sayyohlar oqimini ko‘paytirishga ko‘maklashish to‘g‘risida kelishuvga erishildi. Koreya Respublikasining Chanel A va SBS ommaviy axborot vositalari vakillari O‘zbekistonning sayyohlik salohiyati bilan tanishtirish uchun Turizmni rivojlantirish davlat qo‘mitasi bilan o‘zaro manfaatli hamkorlikni yo‘lga qo‘yishni rejalashtirmoqda.
Izoh (0)