O‘zbekiston Milliy matbuot markazida “Xalq bilan muloqot va inson manfaatlari yili” dasturi doirasida Davlat bojxona qo‘mitasi tomonidan amalga oshirilayotgan chora-tadbirlarga bag‘ishlangan matbuot anjumani o‘tkazildi. Bu haqda qo‘mita axborot xizmati xabar bermoqda.
Tadbirda qayd etilganidek, tadbirkorlik subyektlariga bojxona rasmiylashtiruviga doir bir qator yengillik va qulayliklar yaratish maqsadida Davlat bojxona qo‘mitasi tomonidan “Bojxona.uz” veb-sayti va Yagona interaktiv davlat xizmatlar portali orqali 22 turdagi elektron xizmatlar amaliyotga joriy etildi.
Ular orasida eng ommalashgani tovarlarni elektron deklaratsiyalash xizmati bo‘lib, so‘nggi 2 yil davomida bojxona organlarida rasmiylashtirilgan bojxona yuk deklaratsiyalarining 99,9 foizi elektron tarzda amalga oshirilgan.
Jismoniy shaxslar uchun bojxona hududiga kirib kelish va uni tark etish bo‘yicha “yashil” va “qizil” yo‘lak tizimini amaliyotga tatbiq etish choralarini ko‘rish maqsadida Vazirlar Mahkamasiga takliflar kiritildi.
Joriy yilning o‘tgan 5 oyi davomida davlat bojxona xizmati organlari tomonidan 37 ta holatda 218 dona ekstremistik va aqidaparastlik ruhidagi, 21 ta holatda 230 dona boshqa diniy hamda 12 ta holatda 1396 dona taqiqlangan adabiyot, 2 ta holatda 4 dona diniy mazmundagi risola, 260 ta holatda 7996 dona diniy mazmundagi audio, video mahsulotlar ushlab qolindi.
Davlat bojxona qo‘mitasi markaziy apparati boshqarmalari mutasaddi xodimlarining hududiy boshqarmalarda aholi va tadbirkorlar bilan uchrashuvlar o‘tkazish bo‘yicha tasdiqlangan rejaga muvofiq, 2017-yilning o‘tgan davrida 62 ta uchrashuv o‘tkazildi. Ularda asosiy e’tibor muammoli masalalarni o‘rganish, ularning yechimini topishda amaliy yordam ko‘rsatish, yangi qabul qilingan normativ-huquqiy xujjatlar mazmun-mohiyatini tushuntirishga qaratildi.
Jismoniy va yuridik shaxslarning murojaatlari bilan ishlashni yanada yaxshilash maqsadida Davlat bojxona qo‘mitasi raisining virtual qabulxonasi online.customs.uz manzilida ishga tushirildi.
Joriy yil boshidan buyon Davlat bojxona qo‘mitasiga kelib tushgan 995 ta murojaatning barchasi belgilangan tartibda ko‘rib chiqildi. Ularning 313 tasi O‘zbekiston Respublikasi Prezidentining virtual qabulxonasi orqali, 211 tasi esa Yagona interaktiv davlat xizmatlari portali orqali kelib tushdi.
Ularning asosiy qismini xizmatga qayta tiklash, bojxona nazorati va rasmiylashtiruvi masalalari, bojxona to‘lovlaridan ozod qilish va imtiyozlar qo‘llashga doir murojaatlar tashkil qildi
Izoh (0)