Давлат божхона қўмитаси «яшил» ва «қизил» йўлак тизимини жорий этиш юзасидан ҳукуматга таклиф киритди

Ўзбекистон Миллий матбуот марказида «Халқ билан мулоқот ва инсон манфаатлари йили» дастури доирасида Давлат божхона қўмитаси томонидан амалга оширилаётган чора-тадбирларга бағишланган матбуот анжумани ўтказилди. Бу ҳақда қўмита ахборот хизмати хабар бермоқда. 

Тадбирда қайд этилганидек, тадбиркорлик субъектларига божхона расмийлаштирувига доир бир қатор енгиллик ва қулайликлар яратиш мақсадида Давлат божхона қўмитаси томонидан «Bojxona.uz» веб-сайти ва Ягона интерактив давлат хизматлар портали орқали 22 турдаги электрон хизматлар амалиётга жорий этилди.

Улар орасида энг оммалашгани товарларни электрон декларациялаш хизмати бўлиб, сўнгги 2 йил давомида божхона органларида расмийлаштирилган божхона юк декларацияларининг 99,9 фоизи электрон тарзда амалга оширилган.

Жисмоний шахслар учун божхона ҳудудига кириб келиш ва уни тарк этиш бўйича «яшил» ва «қизил» йўлак тизимини амалиётга татбиқ этиш чораларини кўриш мақсадида Вазирлар Маҳкамасига таклифлар киритилди.

Жорий йилнинг ўтган 5 ойи давомида давлат божхона хизмати органлари томонидан 37 та ҳолатда 218 дона экстремистик ва ақидапарастлик руҳидаги, 21 та ҳолатда 230 дона бошқа диний ҳамда 12 та ҳолатда 1396 дона тақиқланган адабиёт, 2 та ҳолатда 4 дона диний мазмундаги рисола, 260 та ҳолатда 7996 дона диний мазмундаги аудио, видео маҳсулотлар ушлаб қолинди.

Давлат божхона қўмитаси марказий аппарати бошқармалари мутасадди ходимларининг ҳудудий бошқармаларда аҳоли ва тадбиркорлар билан учрашувлар ўтказиш бўйича тасдиқланган режага мувофиқ, 2017 йилнинг ўтган даврида 62 та учрашув ўтказилди. Уларда асосий эътибор муаммоли масалаларни ўрганиш, уларнинг ечимини топишда амалий ёрдам кўрсатиш, янги қабул қилинган норматив-ҳуқуқий хужжатлар мазмун-моҳиятини тушунтиришга қаратилди.

Жисмоний ва юридик шахсларнинг мурожаатлари билан ишлашни янада яхшилаш мақсадида Давлат божхона қўмитаси раисининг виртуал қабулхонаси online.customs.uz манзилида ишга туширилди.

Жорий йил бошидан буён Давлат божхона қўмитасига келиб тушган 995 та мурожаатнинг барчаси белгиланган тартибда кўриб чиқилди. Уларнинг 313 таси Ўзбекистон Республикаси Президентининг виртуал қабулхонаси орқали, 211 таси эса Ягона интерактив давлат хизматлари портали орқали келиб тушди. 

Уларнинг асосий қисмини хизматга қайта тиклаш, божхона назорати ва расмийлаштируви масалалари, божхона тўловларидан озод қилиш ва имтиёзлар қўллашга доир мурожаатлар ташкил қилди