Filippin politsiyasi Resorts World Manila mehmonxonasidagi otishmani 42 yoshli mahalliy fuqaro Jessi Karlos Xavyer uyushtirganini aniqladi. Bu haqda “TASS” xabar bermoqda.
Politsiya vakiliga ko‘ra, Jessi Karlos Xavyer qimor o‘yinlari ishqibozi bo‘lgan va buning oqibatida katta qarzga botgan. Huquq-tartibot idoralari hujum qilgan shaxs terrorchi emasligi, balki kazinoni o‘marmoqchi bo‘lganini bildirgandi. Jumladan, u pullarga almashtirish mumkin bo‘lgan fishkalarni olib ketgan.
1-iyun kuni kechki payt qurollangan erkak mehmonxona kazinosiga kirib, o‘t ochdi va bir necha stolga o‘t qo‘ydi. Hodisa oqibatida 37 kishi halok bo‘ldi, yana 54 kishi jabrlandi.
Oldinroq bu otishma uchun javobgarlikni IShID zimmasiga olgani ma’lum qilingandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)