Xitoy KXDRga bosim o‘tkazishni kechiktirish bo‘yicha AQShga iltimosi haqidagi xabarni rad etdi

Xitoy Tashqi ishlar vazirligi rasmiy vakili Lu Kan Pekin Pxenyanga iqtisodiy ta’sir ko‘rsatish uchun Vashingtondan 100 kunlik muddat so‘raganligi haqidagi xabarni rad etdi. Bu haqda 24-may, chorshanba kuni Sputnik International xabar bermoqda.

“Bu ma’lumot haqiqatga to‘g‘ri kelmaydi”, — deya ta’kidladi diplomat.

22-may, dushanba kuni Yaponiyaning “Asaxi” gazetasi Amerika yetakchisi Donald Tramp va XXR raisi Si Szinpinning aprel oyidagi uchrashuvida gap yuz kunlik muddat haqida borganligini ma’lum qilgan edi.

Vashington Pxenyanga nisbatan yanada keskinroq sanksiyalar joriy etishni talab qilmoqda. KXDR tashqi savdo aylanmasining 90 foizi Xitoyga to‘g‘ri keladi. AQSh Shimoliy Koreyaga aloqador Xitoy korxonalari bilan hamkorlikni tugatish bilan tahdid qilgan. Bunga javoban Pekin go‘yoki KXDR hukumatiga ta’sir ko‘rsatish uchun yuz kunlik muddat so‘ragan.