Lola Karimova-Tillayeva Islom Karimov nomi berilgan Moskva markazidagi xiyobon va haykal loyihasini shahar boshqaruv idoralariga taqdim etish uchun ijodiy guruh bilan Rossiya poytaxtiga kelganini ma’lum qildi.
“Bu loyiha ustida ish olib borish biz uchun juda katta sharaf va mas’uliyatdir. Mazkur xiyobon shaharning chiroyli joylaridan biri bo‘lib qolishini istaymiz. Shu sababli ushbu loyiha ustida ish olib borishga Londonning chinakkam bezagi bo‘lmish ‘Britaniya uchun jang’ monumental inshooti, Qirolicha-ona haykali hamda Londonning Sent-Pankras stansiyasidagi ‘Uchrashuv joyi’ bronza haykalini yaratgan angliyalik mashhur haykaltarosh Pol Deyni taklif etdik.
Uning so‘nggi san’at asari — ‘Iroq va Afg‘onistondagi urushlar’ memorial yodgorligi 2017-yilning mart oyida Buyuk Britaniya qirolichasi Yelizaveta II tomonidan tantanali ochilgan”, — deyiladi Lola Karimova-Tillayevaning Facebook’dagi sahifasida.
Lola Karimova-Tillayeva mazkur loyihada ishtirok etayotgan barcha insonlarga o‘z minnatdorchiligini izhor etdi.
Suratlarda Tatyana Karimova, Lola Karimova-Tillayeva, haykaltarosh Pol Dey hamda ishchi guruh a’zolarining Moskva rasmiylari bilan uchrashuvi va Pol Dey tomonidan yaratilgan Londondagi yodgorlik aks etgan.
Izoh (0)