O‘zbekiston yengil sanoati 2016-yilga kelib mahalliy xomashyoning 53 foizini qayta ishlashga muvaffaq bo‘ldi

Mustaqillik yillarida yuqori rivojlanish ko‘rsatkichlarini namoyon etgan O‘zbekiston yengil sanoati 2016-yilga kelib mahalliy xomashyoning 53 foizini qayta ishlashga muvaffaq bo‘ldi va eksport qilingan mahsulot qiymati 1,2 mlrd dollarni tashkil qildi. Ishlab chiqarilayotgan mahsulotlar dunyoning 60 dan ortiq davlatiga eksport qilinmoqda. “O‘zbekyengilsanoat” AJ boshqaruvi raisining maslahatchisi Rasul Sodiqov Xalqaro press-klubning 24-mayda bo‘lib o‘tgan sessiyasida ana shunday ma’lumotlarni keltirib o‘tdi.

Shuningdek, press-klub yig‘ilishida mamlakat yengil sanoat, moda va dizayn sohasining yetakchi vakillari ishtirok etdi. Jumladan, “Osiyo ramzi” O‘zbekiston dizaynerlar uyushmasi raisi, Toshkent to‘qimachilik va yengil sanoat instituti prorektori Hamida Komilova, “Istiqlol” dizayn markazi direktori o‘rinbosari Murodbek Qurbonov.

Press-klub mehmonlari yengil sanoat, moda va dizayn sohasida erishilgan yutuqlar va istiqboldagi rejalar haqida jurnalistlar bilan o‘rtoqlashdi.

“Bugungi o‘zbek modasining xalqaro tanlov va namoyishlarda alohida e’tirofga sazovor bo‘layotgani O‘zbekistonda bu sohaning rivojlanayotganidan dalolat beradi. Hozirgi kunda bir nechta dizaynerlar o‘zining show-room’iga, o‘zining brendiga, o‘z yo‘nalishiga ega”, — deya o‘zbek moda sanoatining yutuqlari haqida gapirdi “Osiyo ramzi” O‘zbekiston dizaynerlar uyushmasi raisi Hamida Komilova.

Yaqin vaqt ichida Fransiya dizayn akademiyasi bilan hamkorlik o‘rnatishni rejalashtirayotgan “Istiqlol” dizayn markazi direktorining o‘rinbosari Murodbek Qurbonovning ta’kidlashicha, markazning yangi modellar yaratish bo‘yicha laboratoriyasi mutaxassislari Germaniya, Fransiya va Italiyada malaka oshirib kelgan. Tadbirkorning so‘zlariga ko‘ra, yaratilgan soliq va bojxona imtiyozlari mahsulotlar sifatini yaxshilash va raqobatbardoshligi oshirishga, shu tariqa eksportbop mahsulotlar ishlab chiqarishga imkon bermoqda. Markaz vakili Fransiya dizayn akademiyasi bilan o‘rnatiladigan hamkorlik aloqalari Yevropa bozoriga chiqish uchun imkoniyat yaratishiga umid bildirmoqda.