O‘zbekiston Prezidenti Shavkat Mirziyoyev “Kasanachilikni yanada rivojlantirish uchun qulay sharoitlar yaratish chora-tadbirlari to‘g‘risida”gi qarorni imzoladi. Bu haqda O‘zA xabar bermoqda.
Qarorda kasanachilikni yanada rivojlantirish hamda zamonaviy mashina, asbob-uskunalar, xomashyo va materiallarni xarid qilish uchun moliyaviy resurslar bilan foydalanishni kengaytirish orqali oila byudjetlari daromadlarini ko‘paytirish maqsadida Toshkent shahrida tijorat banklari tomonidan boshlang‘ich ustav kapitali 50 milliard so‘m bo‘lgan “Kasanachilikni qo‘llab-quvvatlash bo‘yicha Konsorsium” mas’uliyati cheklangan jamiyatini tashkil etilishi ma’qullangan.
Konsorsiumga qaror ilovasidagi ro‘yxatga muvofiq zamonaviy mashina, asbob-uskunalar, xomashyo va materiallarni xarid qilishga kasanachi va (yoki) kasana mahsulotlarini ishlab chiqarishga buyurtma beruvchi korxonalarga zayomlar ajratish;
Qaror ilovasida keltirilgan kasanachilik turlari bo‘yicha uy sharoitida mahsulotlar (tovarlar va xizmatlar) ishlab chiqarish uchun marketingni amalga oshirish va buyurtmachilarni topish vazifalari bilan tarkibiy bo‘linmalar hamda kasanachi va kasana mahsulotlarini ishlab chiqarishga buyurtma beruvchi tashkilotlar o‘rtasida o‘zaro aloqalar o‘rnatishni ta’minlash bo‘yicha Toshkent shahrining barcha tumanlarida filiallarni tashkil etish;
Kasanachilar va kasana mahsulotlarini ishlab chiqarishga buyurtma beruvchi tashkilotlar bilan mahsulotlar ishlab chiqarish, ishlarni bajarish va xizmatlarni ko‘rsatish borasidagi shartnomalarni tuzish huquqlari berildi.
Konsorsium barcha turdagi soliqlar va davlat maqsadli jamg‘armalariga majburiy ajratmalar to‘lashdan ozod etilib, bo‘shayotgan mablag‘lar ustav jamg‘armasini to‘ldirishga yo‘naltiriladi.
Qarorga muvofiq, kasanachilarga zamonaviy mashina, asbob-uskunalar, xomashyo va materiallarni xarid qilish uchun zayomlarni ajratish sotib olinayotgan tovarlarni kafillikka olish orqali amalga oshiriladi.
2017-yilning 1-iyulidan boshlab kasanachilar uchun jismoniy shaxslarga qo‘llaniladigan daromad solig‘i qat’iy 7,5 foiz miqdorida belgilanadi.
Izoh (0)