Mahallalarga undirilgan kommunal qarzdorlikning 2 foizidan 10 foizigacha beriladi

Moliya vazirligining qarori bilan Aholi tomonidan kommunal xizmatlar haqi o‘z vaqtida va to‘liq to‘lanishini ta’minlagani uchun fuqarolarning o‘z-o‘zini boshqarish organlari va xususiy uy-joy mulkdorlari shirkatlarini rag‘batlantirish tartibi to‘g‘risidagi nizomga o‘zgartirishlar kiritildi, deb yozadi Norma.

Bugungi kunda kommunal xizmat ko‘rsatuvchi korxonalar prognoz qilingan tushum 100 foizga to‘plangan taqdirda, yig‘ilgan mablag‘ning 10 foizini fuqarolarning o‘z-o‘zini boshqarish organlariga ajratib, ularni rag‘batlantiradi.

Ammo tuzatishlar kuchga kirgach, ularning o‘zaro moliyaviy munosabati quyidagicha bo‘ladi:

• reja 100 foiz bajarilsa, umumiy summadan 10 foiz beriladi;
• reja 75 foizdan oshsa, umumiy summadan 5 foizgacha beriladi;
• elektr energiya bo‘yicha to‘lovlar 100 foiz yig‘ilsa — tuman yoki shahar elektr ta’minoti korxonalari taqdim etgan topshiriq-ro‘yxatlarda sanab o‘tilgan odamlardan undirilgan muddati o‘tib ketgan debitorlik qarzi summasidan 2 foizgacha beriladi.