O‘zbekistonga investitsiyalar jalb etilishiga xalal berayotgan valyuta siyosati, Islom Karimov nomini olgan Toshkent aeroporti, poytaxt IIBB tomonidan fosh etilgan O‘zMTRK ko‘rsatuvi va kunning boshqa muhim xabarlari

4-mayning e’tiborga molik yangiliklari — “Daryo”ning kechki dayjestida.

1. Eduards Stiprays: Valyuta siyosati O‘zbekistonga investitsiyalar jalb etilishiga mone bo‘lmoqda. “Valyuta siyosatidagi o‘zgarishlar yevropalik investorlar uchun jiddiy ishora bo‘lib xizmat qiladi”, — dedi Yevropa Ittifoqi elchisi.

2. Toshkent xalqaro aeroportiga Islom Karimov nomi berildi. Bosh vazir Abdulla Aripov boshchiligida xalqaro aeroportda yo‘lovchilarga xizmat ko‘rsatish sifati tubdan yaxshilash bo‘yicha choralar ko‘riladi.

3. Shavkat Mirziyoyev “O‘zbekiston 24” teleradiokanalini tashkil etish haqidagi qarorni imzoladi. Yangi kanal yaqin oylarda efirga chiqishi kutilmoqda.

4. “O‘zbekiston” telekanali ichki ishlar organlarining faoliyati tanqid qilingan ko‘rsatuvda sahnalashtirilgan kadrlardan foydalangani aniqlandi. Ma’lum bo‘lishicha, ko‘rsatuvdagi bolalarning urush-janjal qilayotgani aks etgan lavha 2014-yilgi dasturdan olingan.

5. Toshkentda voyaga yetmagan qizlarni fohishalik bilan shug‘ullanishga majbur qilgan shaxs qo‘lga olindi. Gumonlanuvchi jabrlanuvchi qizlarni yalang‘och holda suratga tushirib, fotosuratlarni qizlarning ota-onasi va o‘quv muassasasiga jo‘natish bilan qo‘rqitgan.