O‘zbekiston Respublikasi Xalq ta’limi vazirligi va Sog‘liqni saqlash vazirligining qarori (pdf) bilan Bolalar sog‘lomlashtirish oromgohlari to‘g‘risidagi nizom tasdiqlandi, deb yozadi Norma.
Bolalar statsionar oromgohga quyidagi hujjatlar asosida qabul qilinadi:
- Balansda saqlovchi tomonidan beriladigan yo‘llanma;
- bolaning tug‘ilganlik to‘g‘risidagi guvohnomasi yoki pasporti nusxasi;
- davolash-profilaktika muassasasi tomonidan bolaning sog‘lig‘i haqida berilgan tibbiy ma’lumotnoma (079/x-shakl).
Bola 3 kun ichida davolanib kelgan taqdirda, statsionar oromgohga qabul qilinadi va joriy smenaning yakuniga qadar oromgohda dam oldiriladi. Davolanish muddati uch kundan ortiq davom etgan taqdirda, ota-onasining 10 kun ichida berilgan yozma murojaatiga asosan bolaga berilgan yo‘llanma Balansda saqlovchi tomonidan qaytarib olinadi va yo‘llanma uchun to‘langan mablag‘ning 85 foizi to‘lovchiga qaytariladi.
Kunduzgi oromgohga esa quyidagi hujjatlar taqdim etiladi:
- ota-onalar tomonidan oromgoh rahbari nomiga yozilgan ariza;
- ota-onalardan birining fuqarolik pasporti nusxasi;
- bolaning tug‘ilganlik to‘g‘risidagi guvohnomasi yoki pasporti nusxasi;
- davolash-profilaktika muassasasi tomonidan bolaning sog‘lig‘i haqida berilgan tibbiy ma’lumotnoma (079/x-shakl);
- to‘lov to‘langanligini tasdiqlovchi hujjat (kvitansiya, to‘lov topshiriqnomasi) nusxasi.
Oromgoh davlat boshqaruvi va mahalliy davlat hokimiyati organlari hamda boshqa tashkilotlar (bundan buyon matnda Balansda saqlovchi deb yuritiladi) tomonidan tashkil etiladi.
Oromgohda bolalarni sog‘lomlashtirish muddatlari Balansda saqlovchi(lar) tomonidan belgilanadi. Bunda sog‘lomlashtirish muddatlari yozgi mavsumda 10 kundan, kuzgi, qishki va bahorgi mavsumda 7 kundan kam bo‘lmasligi lozim.
Har bitta oromgohda to‘garaklar tuziladi, har bir to‘garakda kamida 10 nafar bolalardan iborat guruhlar tashkil etiladi.
Oromgohda barcha yo‘nalishdagi to‘garak mashg‘ulotlari uchun haftada 4 akademik soat, sayyohlik-o‘lkashunoslik yo‘nalishidagi to‘garaklar uchun haftada 6 akademik soat ajratiladi.
Izoh (0)