Ўзбекистон Республикаси Халқ таълими вазирлиги ва Соғлиқни сақлаш вазирлигининг қарори (pdf) билан Болалар соғломлаштириш оромгоҳлари тўғрисидаги низом тасдиқланди, деб ёзади Norma.
Болалар стационар оромгоҳга қуйидаги ҳужжатлар асосида қабул қилинади:
- Балансда сақловчи томонидан бериладиган йўлланма;
- боланинг туғилганлик тўғрисидаги гувоҳномаси ёки паспорти нусхаси;
- даволаш-профилактика муассасаси томонидан боланинг соғлиғи ҳақида берилган тиббий маълумотнома (079/х-шакл).
Бола 3 кун ичида даволаниб келган тақдирда, стационар оромгоҳга қабул қилинади ва жорий сменанинг якунига қадар оромгоҳда дам олдирилади. Даволаниш муддати уч кундан ортиқ давом этган тақдирда, ота-онасининг 10 кун ичида берилган ёзма мурожаатига асосан болага берилган йўлланма Балансда сақловчи томонидан қайтариб олинади ва йўлланма учун тўланган маблағнинг 85 фоизи тўловчига қайтарилади.
Кундузги оромгоҳга эса қуйидаги ҳужжатлар тақдим этилади:
- ота-оналар томонидан оромгоҳ раҳбари номига ёзилган ариза;
- ота-оналардан бирининг фуқаролик паспорти нусхаси;
- боланинг туғилганлик тўғрисидаги гувоҳномаси ёки паспорти нусхаси;
- даволаш-профилактика муассасаси томонидан боланинг соғлиғи ҳақида берилган тиббий маълумотнома (079/х-шакл);
- тўлов тўланганлигини тасдиқловчи ҳужжат (квитанция, тўлов топшириқномаси) нусхаси.
Оромгоҳ давлат бошқаруви ва маҳаллий давлат ҳокимияти органлари ҳамда бошқа ташкилотлар (бундан буён матнда Балансда сақловчи деб юритилади) томонидан ташкил этилади.
Оромгоҳда болаларни соғломлаштириш муддатлари Балансда сақловчи(лар) томонидан белгиланади. Бунда соғломлаштириш муддатлари ёзги мавсумда 10 кундан, кузги, қишки ва баҳорги мавсумда 7 кундан кам бўлмаслиги лозим.
Ҳар битта оромгоҳда тўгараклар тузилади, ҳар бир тўгаракда камида 10 нафар болалардан иборат гуруҳлар ташкил этилади.
Оромгоҳда барча йўналишдаги тўгарак машғулотлари учун ҳафтада 4 академик соат, сайёҳлик-ўлкашунослик йўналишидаги тўгараклар учун ҳафтада 6 академик соат ажратилади.
Изоҳ (0)