O‘zbekiston Prezidenti Shavkat Mirziyoyev Qozog‘iston bilan har tomonlama munosabatlarni yanada chuqurlashtirishga tayyorligini ma’lum qildi, deb yozadi “Kazinform”.
“Siz, Nursulton Abishevich, o‘tgan yili sentabrda, Samarqandga tashrifingiz chog‘ida Qozog‘iston va O‘zbekiston doimo birga bo‘lishi haqidagi gaplarni aytgan edingiz. Yaxshi kunlarda xursandchiligimizni baham ko‘rib, og‘ir paytlarda bir-birimiz uchun qayg‘uramiz, degandingiz. O‘tgan yili Samarqandda aytgan gaplaringiz bizni yanada yaqinlashtirdi va butun o‘zbek xalqi haqiqiy do‘st va qardoshning yelkasini his qildi”, — dedi O‘zbekiston Prezidenti davlat rahbarlarining Oqo‘rdadagi ikki tomonlama uchrashuvi chog‘ida.
Shavkat Mirziyoyev so‘nggi besh oy davomida ikki mamlakat o‘rtasidagi aloqalar yangicha tus olib borayotganini ta’kidladi.
Uning so‘zlariga ko‘ra, ushbu qisqa muddatda hududiy hamkorlikka katta e’tibor qaratilgan. Qozog‘istonning uchta viloyati rahbarlari O‘zbekistonda bo‘lib qaytgan, O‘zbekiston hududlarining ko‘plab rahbarlari Qozog‘istonga kelib ketgan.
“Siz Birinchi Prezident Islom Abdug‘aniyevich bilan ushbu ko‘prikni qurgansiz, va bu ko‘prik mustahkamlanadi. Biz doim Qozog‘istonni eng yaqin va eng ishonchli qo‘shni sifatida ko‘ramiz”, — deya qayd etdi Shavkat Mirziyoyev.
O‘zbekiston rahbari uning ilk tashriflaridan biri Qozog‘istonga amalga oshirilgani ko‘p narsani bildirishini qo‘shib qo‘ydi.
Izoh (0)