18-fevral kuni Jahon boks seriyasining (WSB) 2017-yilgi mavsumi hisobidan 2-tur janglari bo‘lib o‘tadi. Unda O‘zbekiston sharafini himoya qiladigan Uzbek Tigers Qozog‘istonda Astana Arlans klubi bilan bellashadi.
Musobaqaning 1-turini Xitoyda China Dragons’ga qarshi o‘tkazgan Uzbek Tigers 2:3 hisobida imkoniyatni boy bergandi. Unda o‘zbekistonlik bokschilardan ikki nafari raqiblarini mag‘lub etgan bo‘lsa, yana shunchasi mag‘lubiyat alamini totib ko‘rdi. Elnur Abduraimov esa janglardan bir kun muqaddam jarohat olib, ringga ko‘tarila olmadi.
O‘zbekiston boks federatsiyasi matbuot xizmati Qozog‘istonga yo‘l olayotgan sportchilar nomini oshkor qildi. Unga ko‘ra, tarkib Xitoydagidan butunlay o‘zgartirilgan hamda Rio—2016 Olimpiadasida O‘zbekiston sharafini himoya qilgan bokschilardan to‘rt nafari tanlab olingan.
Olimpiadaning kumush medallariga ega chiqqan Shahram G‘iyosov va Bektemir Meliqo‘ziyev mos ravishda -69 va -81 kilogramm vazn toifalarida ringga chiqadi. Bronza sohibi Murod Ahmadaliyev -60 kilogrammda o‘z omadini sinab ko‘rsa, Rio—2016 da O‘zbekiston bayrog‘ini ko‘tarib chiqqan Bahodir Jalolov +91 kilogramm vazn toifasida ko‘rinish beradi. Shuningdek, -52 vaznda Abror Qodirov nomi bor. O‘zbekistonning 2016-yildagi eng yaxshi sportchisi Hasanboy Do‘stmatov esa ro‘yxatda yo‘q.
Ma’lumot uchun, 17-fevral kuni bokschilarni taroziga tortish marosimi bo‘lib o‘tadi. 18-fevral kuni esa Qozog‘iston va O‘zbekiston tomoni o‘z bokschilarini birin-ketin ringga kiritadi. Qayd etish kerak, Astana Arlans turnirning 1-turida Rossiyaning Boxing Team jamoasini mag‘lub etishga muvaffaq bo‘lgandi.
Izoh (0)