18 февраль куни Жаҳон бокс сериясининг (WSB) 2017 йилги мавсуми ҳисобидан 2-тур жанглари бўлиб ўтади. Унда Ўзбекистон шарафини ҳимоя қиладиган Uzbek Tigers Қозоғистонда Astana Arlans клуби билан беллашади.
Мусобақанинг 1-турини Хитойда China Dragons’га қарши ўтказган Uzbek Tigers 2:3 ҳисобида имкониятни бой берганди. Унда ўзбекистонлик боксчилардан икки нафари рақибларини мағлуб этган бўлса, яна шунчаси мағлубият аламини тотиб кўрди. Элнур Абдураимов эса жанглардан бир кун муқаддам жароҳат олиб, рингга кўтарила олмади.
Ўзбекистон бокс федерацияси матбуот хизмати Қозоғистонга йўл олаётган спортчилар номини ошкор қилди. Унга кўра, таркиб Хитойдагидан бутунлай ўзгартирилган ҳамда Рио—2016 Олимпиадасида Ўзбекистон шарафини ҳимоя қилган боксчилардан тўрт нафари танлаб олинган.
Олимпиаданинг кумуш медалларига эга чиққан Шаҳрам Ғиёсов ва Бектемир Мелиқўзиев мос равишда -69 ва -81 килограмм вазн тоифаларида рингга чиқади. Бронза соҳиби Мурод Аҳмадалиев -60 килограммда ўз омадини синаб кўрса, Рио—2016 да Ўзбекистон байроғини кўтариб чиққан Баҳодир Жалолов +91 килограмм вазн тоифасида кўриниш беради. Шунингдек, -52 вазнда Аброр Қодиров номи бор. Ўзбекистоннинг 2016 йилдаги энг яхши спортчиси Ҳасанбой Дўстматов эса рўйхатда йўқ.
Маълумот учун, 17 февраль куни боксчиларни тарозига тортиш маросими бўлиб ўтади. 18 февраль куни эса Қозоғистон ва Ўзбекистон томони ўз боксчиларини бирин-кетин рингга киритади. Қайд этиш керак, Astana Arlans турнирнинг 1-турида Россиянинг Boxing Team жамоасини мағлуб этишга муваффақ бўлганди.
Изоҳ (0)