Uzbek Tigers WSB’ning 2017-yilgi mavsumini China Dragons’ga uchralgan mag‘lubiyat bilan boshladi
Butunjahon boks seriyasi (WSB)ning 2017-yilgi mavsumida O‘zbekistonning Uzbek Tigers jamoasi ilk bellashuvini Xitoyda mezbon jamoa China Dragons bokschilariga qarshi bahs olib bordi. Rio–2016 Olimpiya o‘yinlari qahramonlarisiz ishtirok etgan Uzbek Tigers xitoylik raqiblariga 2:3 hisobida imkoniyatni boy berdi.
-49 kilogramm vazn toifasida Mironshoh Ibragimov mezbonlar bokschisi Sin Xuangni 3:0 hisobida mag‘lubiyatga uchratdi va terma jamoaga ilk ochkoni olib keldi.
-56 kilogramm vaznda ringga ko‘tarilgan Abdulhay Shorahmatov besh raund natijasiga ko‘ra Long Vangni 3:0 hisobida mag‘lubiyatga uchratib, hisobni 2:0 ko‘rinishiga olib keldi.
Shundan so‘ng navbat-64 kilogrammdagi bokschilarga yetib keldi. Unda Uzbek Tigers vakili Elnur Abduraimov xitoylik Chianxun Xuga qarshi ringga ko‘tarilishi kerak edi, ammo o‘zbekistonlik bokschi noma’lum sabablarga ko‘ra ringga ko‘tarilmadi.
-75 kilogramm vazn toifasida Ulug‘bek Haqberdiyev kutilmaganda Minggan Zaoga imkoniyatni boy berdi. Dastlabki uch raundda ochkolar bo‘yicha hisobda oldinga borayotgan O‘zbekiston vakili 4-raundda kuchli zarba qabul qilib oldi va referi jangni to‘xtatishga majbur bo‘ldi. Natijada China Dragons hisobni tenglashtirdi – 2:2.
91 kilogrammgacha vaznda Boburbek Yo‘ldoshev Jin Guoga qarshi bellashdi va ochkolar hisobi bo‘yicha (1:2) imkoniyatni boy berdi. Shu tariqa, Uzbek Tigers WSB’ning 2017-yilgi mavsumini mag‘lubiyat bilan boshladi.
Ma’lumot uchun, O‘zbekiston Butunjahon boks seriyasidagi debyutini 2016-yilda boshlab, ilk urinishidayoq yarim finalga yetib borgan va bo‘lajak chempion Cuba Domadores’ga mag‘lub bo‘lgandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
