OAV: Oq uy vakillari CNN telekanali efiriga chiqishdan bosh tortdi

Oq uy vakillari CNN telekanalidagi dasturlarda ishtirok etmaydi. Bu haqda Politico AQSh prezidenti Donald Tramp ma’muriyatidagi mansabdorga tayanib xabar berdi, deb yozadi “RBK”.

Nashr ta’kidlashicha, ma’muriyat xodimlari avvalgidek, telekanal muxbirlari savollariga javob berishda davom etmoqda, ammo Oq uy matbuot kotibi Shon Spayser va Trampning maslahatchisi Kellienn Konuey so‘nggi vaqtlarda haqiqatan ham CNN efirlarida chiqmagan.

CNN muxbirlaridan biri yangi ma’muriyat shu tariqa telekanalni “jazolash”ga va uning reytingini pasaytirishga urinayotganini aytdi. Shon Spayser, o‘z navbatida, telekanalning Oq uy tomonidan boykot qilingani haqidagi taxminlarni rad etdi.

11-yanvar kuni CNN o‘z manbalariga tayanib, Rossiyada Trampni obro‘sizlantiruvchi materiallar bo‘lishi mumkinligi haqida yozgan edi. Telekanal ushbu ma’lumotni Britaniya razvedkasining sobiq xodimidan olganini yozgandi. Ertasi kuni saylangan AQSh prezidenti sifatidagi ilk matbuot anjumanida Tramp CNN muxbiri savolini eshitishdan bosh tortgan va telekanalni “soxta xabarlar tarqatuvchi” deb atagan edi.